ԵՊՀ սահմանադրական իրավունքի ամբիոնի վարիչ Վարդան Այվազյանը եւս կպաշտպանի երեկ Տավուշում ձերբակալված՝ «Ժողովրդավարական համախմբում» կուսակցության նախագահ Սուրեն Պետրոսյանի շահերը: Այդ մասին այսօր ի պաշտպանություն Սուրեն Այվազյանի կազմակերպված ցույցի ժամանակ ասաց Վարդան Այվազյանը: Սուրեն Պետրոսյանի շահերը կներկայացնեն նաեւ Ռուբեն Մելիքյանը եւ Վարազդատ Հարությունյանը:
Վարդան Այվազյանը նշեց, որ Սուրեն Պետրոսյանի մասով տեղեկատվական մեծ վակուում կա. «Երեկ երեկոյան, նրան ձերբակալելուց հետո, քիչ առաջ նոր տեղեկատվություն ենք ստացել, որ հարուցված է քրեական գործ եւ այն հանձնարարված է հատուկ կարեւորագույն գործերով քննիչ Գագիկ Հարությունյանին»:
Վարդան Այվազյանի դիտարկմամբ՝ Սուրեն Պետրոսյանի դեմ իրականացվողը դասական քաղաքական հետապնդում է, իշխանության վախի դրսեւորում է, ինչը երկար տեւել չի կարող:
Վարդան Այվազյանն անդրադարձավ նաեւ Տավուշում ստեղծված իրավիճակին, մասնավորաբար, հարցի իրավական կողմին: Ըստ այդմ, 1995-ի հուլիսի 5-ին, հանրաքվեով ընդունված Սահմանադրություն ունենք, որը մեր երկրի իրավական համակարգի բուրգի վերեւում է, այն ունի այնպիսի իրավական կշիռ, որին ոչ միայն իշխանության սիրելի՝ Ալմա-Աթայի փաստաթուղթը, ոչ էլ որեւէ այլ միջազգային փաստաթուղթ չի կարող հակադրվել:
Կարդացեք նաև
Սահմանադրագետի դիտարկմամբ՝ ՀՀ գործող Սահմանադրությամբ ամրագրված է ՀՀ տարածքը, Սահմանադրության նախաբանով նաեւ Արցախն է համարվում Հայաստանի մաս եւ որեւէ իշխանություն, առավել եւս գործադիր իշխանության ղեկավարը, չի կարող միանձնյա ձեւով իր երկրի տարածքները զիջել թշնամուն՝ ինչ-որ պատճառաբանություններով: Այս գործընթացը Վարդան Այվազյանը ապօրինի է համարում, Սահմանադրության կոպտագույն խախտում, իսկ ՀՀ վարչապետին՝ ՀՀ սահմանադրական կարգի խախտող:
Այլ մանրամասները՝ տեսանյութում
Նելլի ԳՐԻԳՈՐՅԱՆ
