«Էօրնեկեան» հանրակրթական դպրոցում «Տերունական» աղոթքով են սկսում դասերը: Հետո երեխաները, մեկը մյուսին հերթ չտալով, ողջունում են դպրոցի հոգեւոր տեսուչ տեր Արսենին՝ «օրհնեցե՛ք, տեր հայր», «օրհնեցե՛ք, տեր հայր»:
Օրվա այսպիսի սկիզբը միակ տարբերությունը չէ հանրակրթական մյուս դպրոցներից:
Այստեղ ստեղծված են բացառիկ պայմաններ՝ կրթությունը դարձնելու հաճույք:
Կարդացեք նաև
Այդպիսի պայմաններում ուսանելով՝ բարձր առաջադիմություն չունենալը, ինչպես ասում են, մեղք է:
«Մի քիչ կարող է ամպագոռգոռ թվալ, բայց մեր երեխաները արդյունք են Վեհափառ Հայրապետի լույս տեսիլքի, որ ժամանակին ունեցել էր, մինչեւ այս դպրոցի հիմնելը: Եվ այդ տեսիլքը փորձում ենք ամեն կերպ արդարացնել, որովհետեւ մեզ համար էլ մեծ պատիվ է, որ Վեհափառ Հայրապետը մեզ նման առաքելության է կոչել, իսկ այդ առաքելության իրականացումը կայանում է նրանում, որ «Էօրնեկեան» հանրակրթական դպրոցը ավարտած աշակերտը պետք է լինի լավ հայ քրիստոնյա քաղաքացի: Սա իր մեջ ներառում է ոչ միայն բարոյական կերպար, այլ նաեւ հասարակական կերպար տվյալ մարդու, որ վաղը, մյուս օրը պիտի մտնի հասարակություն»,- ասաց ՄԱՍԷ «Էօրնեկեան» դպրոցի տեսուչ տեր Արսեն քահանա Միրզոյանը:
Այս դպրոցը Ամենայն Հայոց Կաթողիկոսը հիմնադրել է 2009-ին՝ Ազգային հերոս, արգենտինահայ գործարար եւ բարերար Էդուարդո Էռնեկյանի հովանավորությամբ:
«Էօրնեկեան» դպրոցի փոխտնօրեն Շողիկ Հարությունյանի խոսքով՝ դպրոցն ունի հրաշալի ավանդույթներ, որոնք հնարավորություն են տալիս սովորողներին կրթությունը եւ դաստիարակությունը զուգահեռելու. «Մեր սովորողները ավարտում են՝ արդեն իսկ ուսանողներ են: Անցյալ ուսումնական տարում 43 շրջանավարտներից 42-ը ընդունվել են: Իհարկե, մեկը ոչ թե չի ընդունվել, այլ չի դիմել: Այնպես որ այսօրվա մեր շրջանավարտների թվում կան այնպիսիները, որոնք արդեն իսկ ընդունվել են, արդեն իսկ ուսանողներ են: Իսկ նրանք, որոնք արդեն սովորում են բուհերում, իրենցից միշտ մենք ստանում ենք շնորհակալագրեր, որ մենք իրենց ենք վստահել այդպիսի աշակերտներ»:
Քիմիայի դասին «փորձության» են ենթարկում Տեր Արսենին: Ձեռքերը թաթախում են «կինոների» արյան մեջ ու հետո օ՜, հրաշք, «մեղքերը» մաքրվում են քիմիական լուծույթով:
Այս դպրոցն ունի յուրահատուկ կանոն՝ կարեւոր է ոչ թե գիտելիքը, այլ ՍԵՐԸ գիտելիքի նկատմամբ:
Տեր Արսենը մեջբերեց հայտնի աստվածաշնչյան խոսքը՝ «Աստված սեր է», ինչպես ասում էր Հովհաննես Աստվածաբանը. «Որտեղ որ սեր կա, այնտեղ Աստված կա, իսկ դրա բացակայությունը բնականաբար կվերածի քաոսի: Գիտելիքն էլ առանց սիրո կարող է տանել մարդուն կործանման, առհասարակ մարդկության կործանման: Առանց սիրո էս կյանքում ոչինչ է հնարավոր: Այս իմաստով մենք փորձում ենք երեխաներին ներշնչել այդ սերը գիտելիքի նկատմամբ: Մենք փորձում ենք երեխաներին սիրել տալ գիրքը, որ դառնա իր ուղեցույցը, իր կյանքի ուղեցույցը, որովհետեւ սիրով քո տեսադաշտը, քո մտահորիզոնը է՛լ ավելի է լայնանում»:
Այս ընտանիքում խորապես հասկանում են՝ շատ մեղքերի պատճառը տգիտությունն է: Կրթությունն է այն զենքը, որով կարող ենք հաղթահարել խնդիրները:
«Կրթված հասարակությունն է, որ հնարավորինս զերծ է մնում մեղքից, հնարավորինս զերծ է մնում սխալ ընտրություն կատարելուց: Գիտելիքը այս առումով այն լույսն է, որ մեր հոգին պիտի առաջնորդի առ Աստված: Գիտելիքը այն փարոսն է, որ յուրաքանչյուր հասարակության, յուրաքանչյուր պետության եւ յուրաքանչյուր անհատի պիտի այդ խավար, խավարչտին ճանապարհներից հասցնի դեպի այն փրկությունը, այն խաղաղ նավահանգիստը, որը որ կլինի թե՛ այս երկրի վրա, թե՛ այն երկնքում՝ երկնային կյանքում»,- ասաց տեր Արսենը:
«Էօրնեկեան» հանրակրթական դպրոցում երեխաները երազում են իրենց նորարարությամբ, իրենց ձեռքբերումով մի քար դնել այն մեծ շենքի պատերի մեջ, որը կոչվում է հայրենիք, հայոց եկեղեցի, ազգ ու պետություն:
Առաջարկում ենք դիտել մեր պատրաստած տեսանյութը:
Հռիփսիմե ՋԵԲԵՋՅԱՆ
