Արտակարգ դեսպանորդ եւ լիազոր նախարար, հասարակական գործիչ Էդգար Ղազարյանը «Հայելի» ակումբում անդրադառնալով Տավուշի մարզում Հայաստանի սահմանները փոփոխելու իշխանության գործողություններին՝ հիշեցրեց, որ խոսքը Տավուշի այն դիրքերի մասին է, որտեղ 2020 թվականի հուլիսին ադրբեջանցիները փորձում էին գրավել, որտեղ մարտական գործողություններ են ծավալվել, ու Նիկոլ Փաշինյանը դա ներկայացրել է որպես իր հերոսական սխրանք։
«ԱԽՔ Արմեն Գրիգորյանն ասում էր, թե Նիկոլն անձամբ է ղեկավարել մարտական գործողությունները, երբ Գրիգորի Խաչատուրովը չի թողել այնտեղ որեւէ մեկը մոտենա։ Խաչատուրովը հաղթեց ու դրա համար էլ գեներալը հիմա այլընտրանքային խափանման միջոցի տակ է, որովհետեւ մեր հողերը պաշտպանող հայրենասեր գեներալ է»,-ասաց նա։
Էդգար Ղազարյանը նաեւ կարծիք հայտնեց, թե ինչի համար պայթեցվեց ՊՆ նախկին շենքը, որտեղ ընտանիքներով բնակություն էին հաստատել պատերազմի մասնակիցները, պայմանագրային զինծառայողները։ «Նրանց դուրս հանեցին՝ պատճառաբանելով, թե շենքը պիտի վերանորոգեն ու տան ՊԵԿ-ին։ Բայց պայթեցրին։ Ալիեւը Ստեփանակերտում հիմնահատակ քանդեց Արցախի ազատամարտի վետերանների շենքը, ԱԺ շենքը։ Բնականաբար, այստեղ էլ ֆիզիկապես գոյություն ունենալ չէր կարող այն շենքը, որտեղից Արցախի հաղթանակները ղեկավարել է Վազգեն Սարգսյանը»,- ասաց բանախոսը։
Աշոտ ՀԱԿՈԲՅԱՆ
