Այսօր կեսօրին՝ ժամը 14․00-ից մինչև 15․00-ի սահմաններում, Շիրակի մարզի մի խումբ քաղաքացիներ Բավրա գյուղի միջպետական անցակետում փակել են ՀՀ-Վրաստան մայրուղին՝ ի զորակցություն տավուշցիների ու ի պաշպանություն հայրենիքի։
Aravot.am-ի հետ զրույցում ցույցի մասնակիցներից մեկը՝ Գյումրու ՀՅԴ ներկայացուցիչ Արա Նախշքարյանն ասաց, որ սա զուտ քաղաքացիական անհնազանդության ակցիա է, որով Հայաստանի Հանրապետության բոլոր բնակիչներին և աշխարհասփյուռ համայն հայությանը ցույց են տվել, թե կոչնակը հնչել է, թեև, ըստ նրա, ուշացել ենք։
Կարդացեք նաև
«Սա քաղաքական ակցիա չէր, կուսակցականություն չկար, թեև տարբեր կուսակցություններից ևս տարբեր ներկայացուցիչներ ևս կային, բայց մեծ մասը հայրենիքի մասին մտահոգ քաղաքացիներ էին։
Որևէ սադրանք, ավելորդ միջադեպ չի եղել, այն վարորդները, որոնք ճանապարհի փակ լինելու պատճառով չէին կարողանում անցնել, բացարձակապես չեն դժգոհել, նրանք ևս իրենց լուռ համաձայնությամբ միացել են հայրենիքի փրկությանը։ Մոտ 45 րոպե փակ է մնացել ճանապարհը։
Մեր նպատակը իշխանության ձեռքը բռնելն է, ժողովրդին արթնանալու կոչ անելն է, այսօր Տավուշն է, վաղը Շիրակը կլինի, պիտի դռներս գան, նոր հասկանա՞նք», -ասաց Արա Նախշքարյանը։
Նունե ԱՐԵՎՇԱՏՅԱՆ
