Ապրիլի 20-ին «Մոսկվա» կինոթատրոնում տեղի ունեցավ «Ժամանակն է» ֆիլմի վերջին ցուցադրությունը, որով եզրափակվեց ֆիլմի էկրանային ցուցադրությունը։ «Ժամանակն է» հայրենասիրական ֆիլմը քրեական դրամա է, այն արծարծում է հայ-թուրքական թեման։ Պատմում է հայ ընտանիքի մասին, որտեղ որդին 25 տարի անց վրեժ է լուծում։ Ֆիլմի պրոդյուսերը և գլխավոր դերակատարը Կամո Ունանյանն է։ Ռեժիսորը՝ Վահե Սայանն է, ֆիլմի երաժշտությունը՝ Նարեկ Պետրոսյանի։
Ֆիլմը նկարահանվել է 4 երկրում՝ Հայաստանում, Վրաստանում, Ռուսաստանում և Թուրքիայում։ Ֆիլմի պրեմիերան կայացել է 2018 թվականի հոկտեմբերի 25-ին՝ Հայաստանում։ Հայաստանյան պրեմիերային հաջորդել է ֆիլմի արտասահմանյան ցուցադրությունները։ Աշխարհի 12 երկրում ցուցադրվելուց հետո ֆիլմի վերջին ցուցադրությունը կայացավ Հայաստանում, որտեղ ներկա էին ֆիլմի դերակատարներ Ալեքսանդր Խաչատրյանը, Ժաննա Բուտուլյանը, Արսեն Լևոնյանը, Անատի Սաքանյանը և արվեստի ու շոու-բիզնեսի անվանի արտիստներ։
Ֆիլմում Հասանի կերպարը մարմնավորած դերասան Ալեքսանդր Խաչատրյանը մինչ դիտումը, իր ելույթում առանձնացրեց ֆիլմի ստեղծագործական կազմի նվիրումով կատարած աշխատանքը և վստահեցրեց, որ այդ նվիրումի արդյունքում շատ լավ ֆիլմ է ստացվել։
Ֆիլմի գլխավոր հերոսի՝ Ռոբի կերպարում նկարահանվել է ֆիլմի սցենարի հեղինակ, պրոդյուսեր, կարատեի աշխարհի և եվրոպայի չեմպիոն Կամո Ունանյանը, ում նախաձեռնությամբ էլ կայացավ վերջին ցուցադրությունը։ Ըստ Կամոյի ֆիլմը 6 տարի անց ցուցադրման կարիք ուներ, հատկապես՝ ապրիլի 24-ից օրեր առաջ։
Կարդացեք նաև
Ողջունելով ներկաներին Ունանյանն ասաց․ «12 երկրում շրջագայելոց հետո որոշեցինք ֆիլմի մեծ էկրաններին ցուցադրությունը եզրափակել փակ ցուցադրությամբ, քանի որ շատերը, այդ թվում և նկարահանված դրերակատարները, դեռ չէին դիտել ֆիլմը։ Թեպետ, լրիվ այլ կերպ էինք նախապատրաստվել այսօրվա համար՝ կարմիր գորգ, հյուրասիրություն, սակայն երկրում ստեղծված վերջին օրերի իրավիճակով պայամանվորված սահմանափակվեցինք միայն փակ ցուցադրությամբ»,- ասաց Կ․ Ունանյանը և հավելեց, որ բացի արտերկրում ցուցադրվելուց, ֆիլմը բացառապես անվճար ցուցադրվել է Հայաստանի 7 քաղաքներում։
Շուտով ֆիլմը կունենա նաև հեռուստապրեմիերա և կցուցադրվի հեռուստադիտողների համար։
Մամուլի հաղորդագրություն
