Մեծ յոթնյակը Երևանին և Բաքվին կոչ է անում հավատարիմ մնալ խաղաղ գործընթացին, Ալիևի վարչակազմին հորդորում կատարել միջազգային պարտավորությունները:
«Հայաստանին և Ադրբեջանին կոչ ենք անում պահպանել լիակատար հանձնառությունը խաղաղության գործընթացին՝ հասնելու արժանապատիվ և տևական խաղաղության՝ հիմնված ուժի չկիրառման, ինքնիշխանության հարգանքի, սահմանների անխախտելիության և տարածքային ամբողջականության սկզբունքների վրա», – հայտարարել են G7-ի անդամ երկրների արտգործնախարարները և ընդգծել՝ «հետագա էսկալացիան անընդունելի կլինի»։
Մեծ յոթնյակը դիմելով Ադրբեջանին հորդորել է «լիովին կատարել միջազգային մարդասիրական իրավունքով ստանձնած իր պարտավորությունները» և համապատասխան քայլեր ձեռնարկել՝ «ապահովելու իրենց տները վերադառնալ ցանկացող փախստականների, տեղահանված անձանց անվտանգ, արժանապատիվ և կայուն վերադարձը»։
Մեծ Բրիտանիայի, ԱՄՆ-ի, Կանադայի, Ֆրանսիայի, Գերմանիայի, Իտալիայի և Ճապոնիայի դիվանագիտական գերատեսչությունների ղեկավարները և Եվրամիության արտաքին քաղաքականության հարցերով բարձր ներկայացուցիչը նաև «վերահաստատում են 1991թ. Ալմա-Աթայի հռչակագրին հավատարիմ լինելու կարևորությունը, որով Հայաստանն ու Ադրբեջանը ճանաչում են միմյանց տարածքային ամբողջականությունն ու ինքնիշխանությունը», կոչ անում ընդլայնել տարածաշրջանային համագործակցությունը և բացել բոլոր սահմանները, ներառյալ՝ Հայաստանի և Թուրքիայի սահմանը։
Կարդացեք նաև
Թարգմանությունը՝ «Ազատության»
