Ընկերության գործը ՍԴ-ն կքննի գրավոր ընթացակարգով՝ ապրիլի 16-ին: Պատասխանող կողմ է ներգրավված Ազգային ժողովը, որը ընդունել է ՀՀ վարչական դատավարության օրենսգիրքը, որի՝ 131 հոդվածի 1-ին (հայցադիմումի ընդունումը մերժելու մասին) մասի եւ 195 հոդվածի (դիմումի ապահովումը վարչական դատարանի որոշմամբ) սահմանադրականության հարցն է վիճարկվում: Մինչ այդ, ՍՊ ընկերությունը 2023 թվականի փետրվարից սկսած դիմել էր ՀՀ վարչական, վարչական վերաքննիչ եւ Վճռաբեկ դատարաններ: Ընկերության հայցապահանջը եղել է ՀՀ կառավարության դեմ. ՍՊԸ-ն պահանջել է ՀՀ կառավարության 2022 թվականի նոյեմբերի 24-ի «Հայաստանի Հանրապետության կառավարության 2018 թվականի դեկտեմբերի 27-ի N 1528-Ն որոշման մեջ փոփոխություն կատարելու մասին» թիվ 1785-Ն որոշումն անվավեր ճանաչել:
Ըստ «Թուֆենկյան Թրանս Կավկազում» ընկերության՝ դատարաններն անտեսել են, որ իրենց կողմից մերժվում է այնպիսի դատական ակտի դեմ ներկայացված բողոքի վարույթ ընդունումը, որը ենթակա է բողոքարկման, ինչն էլ հանգեցրել է ընկերության արդար դատաքննության եւ դատական պաշտպանության իրավունքի` ներառյալ բողոքարկման իրավունքի հիմնարար խախտմանը։ Հասկանալի է, որ ընկերությունը ՍԴ-ից հետո կդիմի ՄԻԵԴ, քանի որ իր բողոքներում իրավական հիմքերից նշվել են կոնվենցիայի մի քանի հոդվածներ:
Ռուզան ՄԻՆԱՍՅԱՆ
«Առավոտ» օրաթերթ
16.04.2024
