«Ինչի՞ մասին է այս օրենքը՝ ընտանեկան բռնությա՞ն: Բա եթե ընտանեկան, էլ կենցաղային բռնությունը тут причём: Եթե ընտանեկան բռնություն է՝ ընտանեկան է: Եթե ընտանեկան չի, Քրեական օրենսգրքի այլ հոդվածներ են»,-այսօր ԱԺ նիստում «Ընտանիքում բռնության կանխարգելման, ընտանիքում բռնության ենթարկված անձանց պաշտպանության եւ ընտանիքում համերաշխության վերականգնման մասին» օրենքում փոփոխությունների նախագծի քննարկման ժամանակ իր ելույթում ասաց «Հայաստան» խմբակցության պատգամավոր Գեղամ Նազարյանը:
Հիշեցնենք, որ նախագծով առաջարկվում է օրենքով արգելել կուսության ստուգումը, քանի որ այն դիտարկվում է բռնության տեսակ։ Նախագծի հեղինակներ Զարուհի Բաթոյանը, Սոնա Ղազարյանը եւ Ծովինար Վարդանյանն ուզում են օրենքի անունը երկրորդ ընթերցմամբ փոխել, դնել «Ընտանեկան եւ կենցաղային բռնության կանխարգելման եւ ընտանեկան եւ կենցաղային բռնության ենթարկված կանանց պաշտպանության մասին օրենք»:
Գեղամ Նազարյանն ասաց. «Սա չի կարելի ընդունել: Ինչի՞ եք փորձում էս օրենքով ընտանիքին հավասարեցնել էն ի՞նչ են ասում՝ համասեռամոլ զույգերին: Ինչի՞ եք հավասարեցնում: Ակնհայտ է, չէ՞, որ այս ամեն ինչը դրա մասին է, որ ընտանիքը հավասարեցնենք էդ զույգերին: Ես դեմ չեմ որեւէ մեկի սեռական կողմնորոշմանը, բացարձակ: Ամեն մեկն ունի իր ընտրությունը, բայց չի կարելի ընտանիքը հավասարեցնել էդ մարդու սեռական կյանքի հետ: Շատ ներողություն, բայց չի կարելի սահմաններ անցնել: Չի՛ կարելի նման բաներ անել: Ինչի՞ համար եք անում»:
Կարդացեք նաև
Հռիփսիմե ՋԵԲԵՋՅԱՆ
