ՀՀ վերաքննիչ վարչական դատարանն այսօր դատավոր Անի Չիլինգարյանի նախագահությամբ, մերժեց ոստիկանության հայցն ընդդեմ բլոգեր Արթուր Չախոյանի, որով ոստիկանությունը պահանջում էր վարչական պատասխանատվության ենթարկել Չախոյանին՝ ոստիկանի օրինական պահանջը չկատարելու համար:
Հիշեցնենք, որ ոստիկանությունն իր այս հայցը ներկայացրել էր 2023 թվականի աշնանը Վայքում ոստիկանների ու բլոգերի միջեւ տեղի ունեցած միջադեպից հետո: Չախոյանը Գորիս, Վայք էր մեկնել օգնելու բռնի տեղահանված արցախցիներին: Եվ Վայքում, որտեղ հաշվառում էին ամիսներ շարունակ բլոկադայում գտնված, քաղցած արցախցիներին, բլոգերը տեսախցիկով արձանագրել էր՝ ինչպես են համակարգչի դիմաց պիցցա ուտում արցախցիներին հաշվառողները:
Ըստ բլոգերի՝ սեղանին ուտելիքներ, խմիչք էր դրված միայն աշխատակիցների համար, մինչդեռ, իրենց դիմած արցախցիները քաղցած հերթերով կանգնած էին։ Նկարահանման հետ կապված ոստիկանների հետ միջադեպ է եղել, պահանջել են Չախոյանից չնկարահանել, իսկ արդեն նկարահանածն էլ ջնջել:
Չախոյանը մեզ հետ զրույցում հիշեց, որ ոստիկանների կողմից օրինական պահանջ ընդհանրապես չի եղել, միայն ոստիկանները շատ կոպիտ ուժի ճնշումով պահանջել են ջնջել հեռախոսներից նկարահանածը. «Ոչ միայն օրինական պահանջ չի եղել, այլեւ ինձ ու ընկերոջս հարվածել են, այդքանից հետո էլ ոստիկանությունը իրավական ընթացք է տվել, թե իբր օրինական պահանջը չի կատարվել: Մեզ հաջողվել էր ջնջած տեսագրությունները վերականգնել, ինչը դատարանում ներկայացրել ենք, դատարանն էլ որոշեց, որ պատասխանատվության ենթարկելու ոստիկանության պահանջն անհիմն է ու ենթակա է մերժման:
Կարդացեք նաև
Փաստացի դուրս է գալիս, որ հերթական անգամ իմ հանդեպ քաղաքական ոտնձգություն է տեղի ունեցել, անհիմն կերպով փորձ է արվել ինձ պատասխանատվության կանչել, ինչը ձախողեց միայն այն պատճառով, որ տեսաձայնագրությունները կարողացանք վերականգնել, ինչը եթե չստացվեր, փաստորեն, ոստիկանությանը կհաջողվեր մեզ վարչական պատասխանատվության ենթարկելու իրենց ցանկությունն իրագործել չեղած օրինական պահանջի չկատարման հիմքով»:
Արփինե ՍԻՄՈՆՅԱՆ
