Շիրակի մարզի Ամասիա խոշորացված համայնքում, որտեղ «Քաղաքացիական պայմանագիր» կուսակցությունն ամեն կերպ փորձում է իշխանափոխություն անել, այդ մասին ՔՊ-ական իշխանավորները չեն էլ թաքցնում, նոր պատմություններ են ի հայտ գալիս։
Դրանք այս անգամ կապված են Ամասիա խոշորացված համայնքի աշխատակազմի ղեկավար Սամվել Էգնատոսյանի՝ Գտաշեն գյուղի գյուղապետի պաշտոնը զբաղեցնելու տարիների հետ։
Մեզ հասած տեղեկություններով, Ամասիայի ոստիկանության տեսուչներից մեկը օրերս զեկուցագիր է ներկայացրել այն մասին, որ Գտաշենի նախկին գյուղապետ Էգնատոսյանը գյուղի երկու սոցիալապես անապահով երկու տարեց կանանց միանվագ դրամական օգնություններ չի տրամադրել։
Ոստիկանությունը պարզել է, որ Ս․ Էգնատոսյանը ավագանու որոշմամբ 2010, 2012,2014 և 2016 թվականներին Գտաշեն գյուղի բնակչուհի Ռ․Գ․-ին որպես միանվագ դրամական օգնություն պետք է տրամադրեր 205․000 դրամ, 2014 և 2016 թվականներին էլ Ս․Պ․-ին պիտի տրամադրեր 105․000 դրամ, սակայն չի տրամադրել։
Այսինքն՝ ըստ ոստիկանության կազմած արձանագրության, նա կասկածվում է 310․000դրամ հափշտակելու մեջ։
Գտաշենցի երկու կանայք մարտի 26-ին հրավիրվել են ոստիկանություն, որտեղ նրանից հաղորդումներ են ընդունվել։
Իսկ կազմված փաստաթղթերն ուղարկվել են ՀՀ հակակոռուպցիոն կոմիտե։
