ՀՀ Հակակոռուպցիոն դատարանում այսօր, դատավոր Վահե Դոլմազյանի նախագահությամբ, շարունակվում է ՀՀԿ փոխնախագահ Արմեն Աշոտյանի եւ մյուսների գործով նիստը:
Դատարանը սկսեց քննել Արմեն Աշոտյանի խափանման միջոցի հարցը։ Նա արդեն տասն ամիս կալանավորված է։
«Հայաստան» և «Պատիվ ունեմ» խմբակցությունների պատգամավորներով Արմեն Աշոտյանի գործով Հակակոռուպցիոն դատարանին երաշխավորություն են ներկայացրել, որով պարտավորություն՝ են ստանձնում՝ ապահովելու Աշոտյանի դատավարական պարտավորությունների պատշաճ կատարումը։
Հայաստանում գտնվող եւ դատարանի դահլիճում ու բակում սպասող 30-ից ավելի պատգամավորների անձնական երաշխավորությունները ներկայացրեց Արմեն Աշոտյանի պաշտպան Ռուբեն Մելիքյանը։
Կարդացեք նաև
«Հայաստան» խմբակցության ղեկավար Սեյրան Օհանյանը դատարանում հայտարարեց՝ Արմեն Աշոտյանի խափանման միջոցը փոխելու դեպքում ինքը երաշխավորում է, որ Արմեն Աշոտյանը չի խոչընդոտելու գործի հետագա քննության ընթացքին։ Այդ են վկայում նաեւ նրա մարդկային որակները, միջազգային հեղինակությունը։
«Կարծում եմ, այդ գործի հիմքում կա քաղաքական հենք»,- ասաց Սեյրան Օհանյանը։ Դատավոր Վահե Դոլմազյանը հորդորեց՝ անձնական քաղաքական կարծիքները դատարանում չբարձրաձայնել։ Սեյրան Օհանյանը հավելեց, որ դատավորն իր որոշմամբ կարող է փարատել այս գործի մասով նման մտահոգությունները։
Գործով մեղադրյալ Մարթա Սիմոնյանի առողջական վիճակով պայմանավորված` նիստն ընդհատվեց։
Արմեն Աշոտյանի խափանման միջոցի հարցի քննությունը կշարունակվի վաղը, ժ. 13.00-ին։
Այլ մանրամասները՝ տեսանյութում
Նելլի ԳՐԻԳՈՐՅԱՆ
