Հովհ. Թումանյանի տուն-թանգարանի տնօրեն Անի Եղիազարյանը (լուսանկարում) , որին ԿԳՄՍ նախարար Ժաննա Անդրեասյանն ազատել էր աշխատանքից, դիմել էր դատարան:
Դատարանն անվավեր է ճանաչել նրան աշխատանքից ազատելու՝ ԿԳՄՍ նախարարի հրամանը:
Տիկին Եղիազարյանն Aravot.am-ին ասաց, որ առայժմ ձեռնպահ կմնա թեմայի վերաբերյալ մեկնաբանություններ անելուց, քանի որ այս փուլում հարցը նախարարության տիրույթում է:
ԿԳՄՍ նախարարությունից Aravot.am-ին հետեւյալը փոխանցեցին. «ԿԳՄՍ նախարարությունում քննարկվում է թիվ ԵԴ2/44185/02/23 քաղաքացիական գործով Երևան քաղաքի առաջին ատյանի ընդհանուր իրավասության քաղաքացիական դատարանի 2024 թվականի մարտի 29-ին կայացրած դատական ակտի բողոքարկման հարցը: Միաժամանակ տեղեկացնում ենք, որ բողոքարկման համար օրենքով սահմանված է մեկամսյա ժամկետ»:
Կարդացեք նաև
Նախարարությունից նաեւ հետաքրքրվեցինք,թե ինչպես է լուծվելու Արցախի ԱԺ նախագահի նախկին խորհրդական Լուսինե Ղարախանյանի հարցը, որը նախարարի որոշմամբ նշանակվել էր Հովհ. Թումանյանի տուն-թանգարանի տնօրենի ժամանակավոր պաշտոնակատար:
Aravot.am-ին նախարարությունից պատասխանեցին,որ ամեն ինչ կլուծվի իրավական գործընթացների համատեքստում՝ այդ հարցը եւս:
Գոհար ՀԱԿՈԲՅԱՆ
