ԱԺ պաշտպանության եւ անվտանգության հարցերի հանձնաժողովի նախագահ Անդրանիկ Քոչարյանը հարցին՝ վարչապետը Ոսկեպարում բնակիչներին խոստացավ, որ 7-10 օրվա ընթացքում լուծումներ կգտնեն ու պատասխան կտան, բայց մինչ օրս ինչո՞ւ չի գնացել ու որեւէ լուծում չի գտել՝ պատասխանեց. «Վարչապետն իր խոստումն ի կատար կածի՝ հաշվի առնելով նաեւ վարչապետի զբաղվածությունը, հանդիպումների ծանրաբեռնված լինելը՝ կարող է 10 օր չի, 15 օր է, բայց այդ հանդիպումը կլինի: Եթե վարչապետը խոստացել է, անպայման կլինի»:
Aravot.am-ը հարցրեց՝ ասում եք՝ վարչապետը խոստանում է ու անում է, բա վարչապետը նախընտրական քարոզարշավին գնաց մարզեր ու 4 գյուղերը տալու հետ կապված ասաց, որ ընդդիմությունն ասում է, թե Բարխուդարլուն, Բաղանիս-Այրումը տալիս ենք, մենք ձեռքներս կկտրենք, դրանք չենք տա, հիմա ինչո՞ւ է այդ գյուղերը տալիս կամ ինչո՞ւ ձեռքերը չի կտրում՝ Անդրանիկ Քոչարյանը պատասխանեց. «Դուք հիմա խառնակչությամբ եք զբաղված, մի՛ խառնակչություն արեք, ձեր հարցին ես չեմ պատասխանելու, որովհետեւ ես չեմ ուզում որեւէ մեկի ձեռքը կտրվի»:
Երբ ասացինք՝ մենք էլ չենք ուզում, բայց վարչապետն է խոստացել, իսկ դուք ասում եք՝ վարչապետն իր խոստումն անում է՝ նա պատասխանեց. «Դե ուրեմն կգնաք առողջապահության նախարարի հետ ձեր հարցերը կճշտեք»:
Հարցին՝ այդ 4 գյուղերը տալը ի՞նչ դիրքային փոփոխություններ է բերելու, մեր զինված ուժերը պե՞տք է էդ բարձունքներից իջնեն, թե՞ ոչ՝ նա պատասխանեց. «Դուք հիմա ուզում եք, որ ես զինված ուժերի փակ պլանավորումները ձեզ ներկայացնե՞մ, ո՞նց եք դա պատկերացնում: Թողեք ամեն ինչ իր հերթականությամբ գնա: Խոսքը գնում է պետական սահմանի արձանագրման գաղափարի շուրջ իրականացվող քննարկումներին: Ինչ ընթացք կունենա, ամեն ինչ միտված է լինելու խաղաղության գաղափարին: Իսկ դրա համար ԶՈՒ-ն ունի իր ծրագրով նախատեսված գործառույթները, իրականացնում է»:
Կարդացեք նաև
Հարցին՝ կրակոցներով խաղաղություն լինո՞ւմ է՝ նա պատասխանեց. «Կրակոցներ պետք է չլինեն: Բայց կրակոցները արդեն 30 տարի է՝ մեզ ուղեկցում են եւ էլի են ուղեկցելու: Կրակոցները պետք է մի օր վերջիվերջո կանգնեն, իսկ դրա համար մենք պետք է երկար ճանապարհ անցնենք, որովհետեւ էս թշնամանքը շատ տարիների արդյունք է: Բոլոր պատերազմները մի օր վերջանում են»:
Հռիփսիմե ՋԵԲԵՋՅԱՆ
