«Համահայկական ճակատ» շարժման առաջնորդ, Պաշտպանության նախկին նախարար, գեներալ-մայոր Արշակ Կարապետյանի նախաձեռնած «Համահայկական ճակատ» կուսակցությունը 2024 թվականի ապրիլի 5-ին Երևանի «Արմենիա Մարիոթ» հյուրանոցի «Տիգրան Մեծ» սրահում անցկացրեց իր հիմնադիր համագումարը:
«Համահայկական ճակատ» շարժման առաջնորդ Արշակ Կարապետյանն իր ելույթի սկզբում կոչ արեց ներկաների հարգել բոլոր նրանց հիշատակը, ովքեր իրենց կյանքը նվիրաբերել են հայրենիքի համար։ Արշակ Կարապետյանը հանգամանալից գնահատական տվեց Հայաստանի ներքաղաքական ու տնտեսական իրավիճակին։ Նա հստակ նկարագրեց երկրի անվտանգությանը սպառնացող իրական արտաքին սպառնալիքներին, շեշտը դնելով երկիրը կառավարելու վարչապետի իսպառ անկարողության վրա և կոչ արեց կառավարությանը հրաժարական տալ՝ հանուն Հայաստանի փրկության։
«Մենք ստեղծելու ենք ամուր պետություն, ունենալու ենք երկրի նախագահ, որին ընտրելու է ժողովուրդը։ Ծնկած վիճակից կկանգնենք։ Շատերը հարցնում են, թե ինչպես կարող է Կարապետյան Արշակը դրսից որևէ բան փոխել, բայց Կարապետյան Արշակը ոչինչ չի փոխելու, դուք եք փոխելու և այդտեղ նստածներդ»,– ասաց «Համահայկական ճակատ» շարժման առաջնորդ, Պաշտպանության նախկին նախարար, գեներալ-մայոր Արշակ Կարապետյանը` դիմելով համագումարի մասնակիցներին։
Համագումարի արդյունքներով կուսակցության առաջնորդ ընտրվեց Արշակ Կարապետյանը։ Եզրափակիչ ելույթում կուսակցության առաջնորդ Արշակ Կարապետյանն առաջարկեց ստեղծել 7 հոգուց բաղկացած խորհուրդ, որի թեկնածությունները հաստատվեցին համագումարի մասնակից պատվիրակների կողմից՝ քվեարկության արդյունքներով։ Ղեկավարի առաջարկությամբ կուսակցության գլխավոր քարտուղարի պաշտոնում ընտրվեց Հովհաննես Շահինյանը։
