«Երբեք այն տպավորությունը չեմ ունեցել, որ մենք Ադրբեջանի նախագահին համոզելու նպատակ ունենք»,-Եվրոպայի և Եվրասիայի հարցերով ԱՄՆ փոխպետքարտուղար Ջեյմս Օ՛Բրայենի և ԱՄՆ ՄԶԳ Եվրոպայի և Եվրասիայի բյուրոյի ղեկավար Էրին ՄքՔիի հետ ճեպազրույցի ժամանակ հայտարարեց ԱՄՆ փոխպետքարտուղար Ջեյմս Օ՛Բրայենը՝ պատասխանելով Թուրան գործակալության լրագրողի հարցին՝ ինչո՞ւ Ադրբեջանի նախագահին այդպես էլ չհաջողվեց համոզել՝ ԵՄ-ի և ԱՄՆ-ի բացատրությունը բավարար չափով համոզի՞չ չէր կամ միգուցե նրանք առաջնորդվում են Ռուսաստանի նարատիվո՞վ։
Ջեյմս Օ՛Բրայենը վստահեցրեց՝ շատ պարզ ու հասկանալի ասել են Ադրբեջանի նախագահին, թե ինչ են մտադրված անել և արել են այն, ինչ ասել են․ «Ես կարծում եմ, որ խոստումները կատարելու վրա է կառուցվում վստահությունը։ Այնպես որ, սա է առաջ գնալու ճանապարհը։ Մենք չափազանց բաց ենք քննարկումներում տարածաշրջանի կառավարությունների հետ, և չկան անակնկալներ։ Դուք պետք է նաև հարցնեք Ադրբեջանի ժողովրդին, թե ինչու են նրանք անում այն, ինչ անում են։ Մենք աջակցում ենք Հայաստանի ժողովրդի ընտրությանը և կշարունակենք դա անել այն ճանապարհով, որը տանում է խաղաղության, բարգավաճման և գլոբալ շուկաների հասանելիության»։
ԱՄՆ փոխպետքարտուղարը, փաստելով, որ Իլհամ Ալիևի հետ վերջին օրերին ԱՄՆ պետքարտուղարը և Եվրահանձնաժողովի նախագահը զրուցել են, ասաց․ «Կառուցողական զրույց է եղել։ Տեղյակ եմ, Իլհամ Ալիևին ասվել է, որ գնում են այն ճանապարհով, ինչը նկարագրվեց այսօր։ Նախագահը դա հասկացել է, նաև ասել է, որ համագործակցությունը ԵՄ-ի և ԱՄՆ-ի հետ յուրաքանչյուր երկրի գործն է։ Եվ մենք կշարունակենք աջակցել խաղաղության հասնելու՝ ՀՀ-ի և Ադրբեջանի ջանքերին։ Դա լավագույն ճանապարհն է տարածաշրջանի համար»։
Ջեյմս Օ՛Բրայենը վստահեցրեց՝ պետքարտուղարը հասկանալի կերպով հայտարարել է, որ մենք աջակցում ենք Հայաստանի ժողովրդի քաղաքական ընտրությանը․ «Հասկանալի է, որ հայ ժողովուրդն ընտրում է բարգավաճման, զարգացման, գլոբալ շուկաներին ինտեգրման ճանապարհը, որը որոշակի բարեփոխումներ և աջակցություն է պահանջում»։
Կարդացեք նաև
Տաթև ՀԱՐՈՒԹՅՈՒՆՅԱՆ
