Ասացիք, որ սկսված է սահմանազատման-սահմանագծման գործընթաց․ ոչ մի գործընթաց սկսված չէ։ Ադրբեջանը միակողմանիորեն ուզում է տարածքներ։ Եթե այս ամենը հասնի սահմանազատման-սահմանագծման գործընթացին՝ դա բոլորովին այլ բան է․ այսօր «Միասին» շարժման հրավիրած քննարկման ժամանակ ասաց ՀՀ նախկին վարչապետ, «Ազատություն» կուսակցության նախագահ Հրանտ Բագրատյանը։
Երկուշաբթի մեկնարկող ԱԺ քառօրյային քննարկվելու է կառավարության 2023 թվականի ծրագրի կատարողականը։ «Միասին» շարժումը ԱԺ երեք խմբակցություններին է փոխանցել պահանջագիր՝ քվեարկելու վարչապետ Նիկոլ Փաշինյանի կառավարության կատարողականին դեմ՝ Նիկոլ Փաշինյանին անվստահություն հայտնելով եւ հարցը քվեարկության դնելով։ Փաստաթղթի հիմնավորումներում նշված է, որ Նիկոլ Փաշինյանը խախտել է 2021 թվականին ԱԺ-ի կողմից հաստատված եւ օրենք դարձած իր իսկ ծրագրի գրեթե բոլոր հիմնադրույթները՝ իրականացնելով տրամագծորեն հակառակ ուղեգիծ։ Փաստաթուղթն ուղարկվել է նաեւ ԱԺ անհատ պատգամավորներին՝ նրանց առջեւ անձնական պատասխանատվության խնդիր դնելով։
Պահանջագրի բովանդակային քննարկումը տեղի ունեցավ այսօր։
Ըստ Հրանտ Բագրատյանի, այսպիսով, Ադրբեջանը հայտարարում է, որ ինքը չի ներկայացնում Խորհրդային Ադրբեջանը, այսինքն՝ նրա իրավահաջորդը չէ, իսկ դա իր հերթին նշանակում է, որ ՀՀ իշխանությունների կողմից 1991 թվականի Ալմա-Աթայի հռչակագրին հղումը «փուչ հռետորաբանություն» է։ ՀՀ-ն հայտարարում է, որ ինքը խորհրդային Հայաստանի իրավահաջորդն է։
Կարդացեք նաև
«Սա նշանակում է, որ Ադրբեջանը որեւէ քարտեզ չի ճանաչի։ Նույնիսկ ամենաադրբեջանանպաստ։ Սա նաեւ նշանակում է, որ սահմանազատման գործընթաց լինել չի կարող։ Հարց է ծագում՝ ո՞րն է լինելու Հայաստանի սահմանը։ Այն սահմանը, որն Ադրբեջանը թույլ կտա մենք ունենանք»,- ասաց Հրանտ Բագրատյանը՝ հավելելով, որ Մհեր Գրիգորյանը կոնկրետ աշխատանք չի տանում, այլ լղոզված բաներ է անում։
Նարինե Դիլբարյանի դիտարկմանը, որ Մհեր Գրիգորյանի շատ հանդիպումներից նույնիսկ տեղեկություններ չեն հրապարակվում՝ քննարկումների ու պայմանավորվածությունների մասին, Հրանտ Բագրատյանը հակադարձեց․ «Չեղած բանը չենք կարող քննարկել։ Կարող է՝ ոչ մի բան էլ չի պայմանավորվել։ Մհեր Գրիգորյանն այն մարդը չէ, որ կարողանա բան պայմանավորվել»։
Նելլի ԳՐԻԳՈՐՅԱՆ
