«Երկրի 70%-ը էսօր դատ ու դատաստանի տակ է ընկնում, էլ ինչի՞ մասին է խոսքը, էսպես երկիր չեն պահում՝ բռնել տալով, պատին ծեփելով, գետին պառկեցնելով՝ էդպես չեն ապրում ու ապրեցնում: Էս ղեկավարները պիտի կարողանան ապրեն ու ապրեցնեն, ոչ թե էս ձեւի անեն: Եթե այս մեղադրանքները այդպես լինեին, գյումրեցիները ինձ էդքան ձայն չէին տա մինչեւ էսօր: 5 անգամ ընտրվել եմ՝ առանց կաշառքի, առանց կեղծիքի: Օֆիսս նստած՝ վերջում էլ երկու անգամ պատգամավոր եղա: Դա նշանակում է, որ էդ մարդիկ ինձ սիրում ու հարգում են»,- Գյումրիի նախկին քաղաքապետ Վարդան Ղուկասյանն այսօր լրագրողների հետ զրույցում այսպես արձագանքեց իր ու որդու՝ Սպարտակ Ղուկասյանի, եղբոր՝ Գեւորգ Ղուկասյանի նկատմամբ փողերի լվացման, պաշտոնեական լիազորությունների մեղադրանքին:
Հիշեցնենք, որ այսօր Հակակոռուպցիոն դատարանում այդ գործի քննությունն էր:
Ըստ մեղադրանքի, 1999-2012 թվականներին Վարդան Ղուկասյանը, տեղյակ լինելով օրենսդրական արգելքի մասին, համայնքի ղեկավարի տեղակալի, քաղաքաշինության բաժնի պետերի օժանդակությամբ ապօրինի օտարել է 24 անուն անշարժ գույք: Անշարժ գույքերի՝ օտարման օրվա դրությամբ կադաստրային արժեքը կազմել է 35 մլն 690 հազար 403 դրամ:
Արդյունքում՝ Վարդան Ղուկասյանը պետության և համայնքի շահերին պատճառել է էական վնաս, անզգուշությամբ առաջացրել է ծանր հետևանքներ, իր պաշտոնեական դիրքն օգտագործելով՝ օրինականացրել է հանցավոր ճանապարհով ստացված՝ 16 մլն 60 հազար 815 դրամ կադաստրային արժեքով 4 անուն անշարժ գույքերը: Գույքերի մի մասը Վարդան Ղուկասյանն օտարել է «Անբերդ» ՍՊԸ-ին, որի հավասարաչափ բաժնետերեր են հանդիսացել ինքն ու եղբայրը, իսկ մյուս մասն ուղղակի վաճառքով 2006 թվականին օտարել է իր հետ մտերիմ հարաբերությունների մեջ գտնվող, իր ընտանիքին պատկանող «Ալեքսանդրապոլ» հյուրանոցի տնօրեն Ա.Մ.-ին, հետո տվյալ հողամասը փոխանցել է Վարդան Ղուկասյանի որդուն` Սպարտակ Ղուկասյանին:
Կարդացեք նաև
Վարդան Ղուկասյանին հարցրեցինք՝ եթե հանիրավի են մեղադրում, բա դատախազի ներկայացրած փաստերը, որ ապօրինի աճուրդներ են եղել, փաստաթղթեր ու ստորագրություններ են կեղծվել, ի՞նչ է նշանակում՝ նա պատասխանեց. «24 գործի մասին է խոսքը, որից 10-ը Բալասանյան Սամվելի օրոք էր, էս տղեն չգիտի էլ հավանական է: Էս 10 գործը իմ օրոք էլ չի եղել, Ղուկասյան Վարդանի վրա մեղադրանքը դրել են, բերել դատարանում կարդում են: Խայտառակություն է»:
Հարցին՝ ձեր դեմ ի՞նչ ունեն, որ ձեզ այսպես ուզում են «փուռը տալ»՝ Վարդան Ղուկասյանը պատասխանեց. «Իմ տեսակի՛ դեմ գործ ունեն: Իմ տեսակը, որ հայրենասեր է, հավատք ունի, խիղճ ունի, չի կոտրվի, իրանց «ստուկաչը» չէ, դրա համար էլ էդպես է: Սա իմ տեսակն է, որ իրանց դուր չի գալիս, դրա համար 2007 թվականին պահ մտան, հարձակվան, խփեցին, 4 տղեն մահացան, մենք էսօր «ինվալիդ» ենք կանգնած ու այսպես շարունակական: Էս վերջի անգամ էլ տղուս տարան, 7 ամիս պահեցին, վերջում արդարացրեցին, էս է, ուրիշ ի՞նչ կա»:
Հռիփսիմե ՋԵԲԵՋՅԱՆ
