Ermenihaber. Թուրքիայի քրդամետ «Ժողովուրդների հավասարություն և ժողովրդավարություն» կուսակցությունը (DEM) Twitter-ում գրառում է կատարել Բիթլիս և Շըրնաք նահանգներում ՏԻՄ ընտրությունների վերաբերյալ։
Մասնավորապես նշվում է, որ իշխող Արդարություն և Զարգացում կուսակցությունը (AKP-ԱԶԿ) այժմ փորձում է հասնել այն արդյունքներին, որին չկարողացավ հասնել Շըրնաքում ընտրողների, քվեատուփերի կեղծման, ընտրողների և ընտրատեղամասերի աշխատողների վրա հարձակմամբ, նահանգային համանախագահների և հարյուրավոր մարդկանց ձերբակալելու և նահանգի շենքը շրջափակելու միջոցով։
Իշխող կուսակցությունը նույն կերպ քվեատուփի արդյունքները փոխելով փորձում է հերթական անգամ յուրացնել ժողովրդի կամքը։ Ընտրատեղամասի աշխատակիցները և փաստաբանները, ովքեր առարկում են, բերման են ենթարկվում։
Գրառման մեջ նաև նշվել է․ «Ամիսներ շարունակ իշխանություններին զգուշացնում ենք, որ հեղաշրջում անելով ձեզ չի հաջողվի յուրացնել ժողովրդի կամքը և չեք կարողանա փոխել ելքը։ Մենք շարունակելու ենք պաշտպանել ժողովրդի հաղթանակները բոլոր հանգամանքներում»։
