Aravot.am-ի տեղեկություններով՝ Վանաձորի ՔԿՀ-ին վերաբերող Լոռու մարզի բնակիչ՝ Է. Ե.-ի ներկայացրած հաղորդման հիման վրա նախաձեռնվել է քրեական վարույթ:
Է. Ե-ն իրավապահներին հայտնել է, որ ՔԿՀ-ում գտնվելու ընթացքում բազմիցս գրավոր դիմումներ է ներկայացրել «Վանաձոր» ՔԿՀ-ի նախկին պետին, որում նշել է, որ ՔԿՀ-ի «Զոն նայող Անդուլիկի» և մյուս բոլոր խցերում իրականացվի դիմակավորված հատուկ ջոկատայինների խուզարկություններ, քանի որ բոլոր խցերում առկա են բջջային հեռախոսներ և այլ արգելված իրեր:
Ըստ հաղորդման՝ ՔԿՀ պետի, ՔԿՀ-ի ռեժիմի պետի և ՔԿՀ-ի այլ իրավասու ծառայողների կողմից միջոցներ չեն ձեռնարկվել վերը նշված ապօրինությունները վերացնելու ուղղությամբ։ 2023թ. ընթացքում Է. Ե-ն ՀՀ ԱԱԾ տնօրենին է դիմումներ ներկայացրել, ինչի արդյունքում այս տարվա փետրվարի 9-ին դիմակավորված հատուկ ջոկատայինները խուզարկություններ են կատարել «Վանաձոր» ՔԿՀ-ում, հայտնաբերել և վերցրել են ապօրինի պահվող թմրանյութեր, մեծ քանակությամբ բջջային հեռախոսներ, լիցքավորման սարքեր, ինքնաշեն ալկոհոլային խմիչքներ, դրսից ՔԿՀ բերված թանկարժեք կահույք և չմաքսազերծված մեծ քանակությամբ ծխախոտ:
Քննչական կոմիտեից մեզ հայտնեցին, որ տվյալ անձի կողմից հաղորդումները ստացվել են հիշյալ ՔԿՀ-ի առնչությամբ, վարույթներ կան նախաձեռնված, որոնցով հաղորդմամբ ներկայացված հանգամանքները ստուգվում են։ Այլ տվյալներ չեն հրապարակվում։
