«Եվրաինտեգրումը հնարավորություններից մեկը չէ, այլ այլընտրանք չունեցող ազգային քաղաքականություն է։ Այս ընտրությունը, որը հիմա մենք կատարում ենք միասին, այն պատմական որոշումը, որը մենք պետք է կայացնենք, դա ոչ թե Ռուսաստանի քաղաքական նենգության, ծավալապաշտության արդյունք է, դա ոչ թե Արցախի ժամանակավոր կորստի արգասիք է, ոչ, դա մեր ժողովրդավարական նկրտումների, ազգային ազատագրական պայքարի տրամաբանական շարունակությունն է»,- «Հանուն Հայաստանի Հանրապետության եվրոպական ինտեգրման» խորագրով համաժողովում ասաց Հայաստանի Եվրոպական կուսակցության նախագահ Տիգրան Խզմալյանը։
«Հայաստանի Եվրոպական կուսակցության անունից երեք գործնական առաջարկ եմ անում մեր հասարակությանը եւ ժողովրդավարական ուժերին, ինչպես նաեւ կառավարությանը։ Առաջինը, ըստ ՀՀ Սահմանադրության 205-րդ հոդվածի, որեւէ վերպետական կառույցի անդամակցելու համար, ինչպես նաեւ Հայաստանի տարածքի փոփոխության համար անհրաժեշտ է անցկացնել հանրաքվե։ Ուստի, մենք առաջարկում ենք սկսել աշխատանքները՝ հանրաքվե անցկացնելու ուղղությամբ։ Եվրոպական ընտրությունը ոչ թե մեկ մարդու, մեկ կուսակցության, այլ ողջ ժողովրդի ցանկությունն է ու ընտրությունը։ Համենայնդեպս մենք աշխարհին եւ ինքներս մեզ դա պետք է ապացուցենք։
Երկրորդ, ես կարծում եմ, որ ժողովրդավարական ուժերն այստեղ ունեն հատուկ առաքելություն եւ առաջակում եմ այդ յուրահատուկ ծրագիրը պայմանականորեն անվանելով եվրոքվե՝ օգնել այս գործընթացի սահուն եւ համոզիչ անցկացմանը՝ կազմակերպելով համապատասխան աշխատանք հասարակության հետ։
Եվ երրորդը, որպես խիստ անհրաժեշտ միջոց՝ մեր կուսակցությունն արդեն սկսել է, եւ հիմա մենք առաջարկում ենք մեր գործընկերներին ու իշխանությանը, օգնել՝ միասին անցկացնելու հետեւյալ մի ծրագիր։ Երեւանում եւ բոլոր մարզերում պետք է հիմնվեն Եվրոպայի տներ՝ մշակութային, տնտեսական, քաղաքական, գաղափարական, ժամանցային հատուկ կենտրոններ, որպեսզի եվրաինգեգրման գաղափարը վերացական ծրագրից դառնա գործնական ու ամենօրյա մեր կենցաղային իրականություն»,- ասաց Խզմալյանը։
Կարդացեք նաև
Նա հավելեց․ «Մեզ փորձում են համոզել, որ Արցախը դա ժողովրդավարացման գինն է։ Մենք երբեք չենք ընդունի այս կեղծ գաղափարը եւ պայքարելու ենք ոչ միայն փախստական դարձած արցախցիների իրավունքների, այլ նաեւ նրանց վերադարձի իրավունքի համար՝ համաձայն միջազգային օրենքի, որը շատ հստակ ձեւավորվեց Հաագային, այսինքն՝ ՄԱԿ-ի գլխավոր քրեական դատարանի 2023 թվականի նոյեմբերի 17-ի դատավճռում»։
Ռոզա ՀՈՎՀԱՆՆԻՍՅԱՆ
