Երեւանի ավագանու «Մայր Հայաստան» խմբակցության անդամ Սամվել Հակոբյանը՝ ԱԺ նախկին պատգամավոր Ռուբեն Հակոբյանի որդին, «Հայելի» ակումբում խոսեց քաղաքապետարանում առկա հակաօրինական, կոռուպցիոն գործողությունների մասին։ Նա, մասնավորապես, նշեց, որ առայժմ դատարան է ներկայացվել առնվազն երեք հայց։
«Առաջինը Տիգրան Ավինյանի լիազորությունները ստանձնելու ապօրինության մասին է։ Մեր պահանջը այն է, որ տվյալ արարողության նիստը, որը տեղի է ունեցել հոկտեմբերի 13-ին, ճանաչվի ոչ իրավազոր, որովհետեւ քվորում չի ապահովվել եւ Ավինյանը լիազորությունները ստանձնել է օրենքի տառին հակառակ։
Երկրորդ հայցով մեր պահանջն է, որ դատարանը ճանաչի այն փաստը, որ քաղաքային իշխանությունը «Մայր Հայաստանի» ավագանի Սամվել Հակոբյանի ներկայացրած նախագիծը պատշաճ կերպով չի ընդունել եւ մերժել է օրենքին ոչ համապատասխան կերպով։ Իսկ նախագիծն այն է եղել, որպեսզի անցկացվի երդմնակալության նոր արարողության նիստ։ Նրանք առնվազն պարտավոր էին մուտք անել որպես նախագիծ, մտցնել օրակարգ, գլխադասային հանձնաժողովում քննարկել, որից հետո պարզ կդառնար այն կմտներ օրակարգ, թե չէ։ Ակնհայտ է, որ այնտեղ իրենք բացասական կքվեարկեին։ Բայց մեր նպատակն է ցույց տալ, որ քաղաքային իշխանությունները ժառանգել են համապետական իրենց քավորների գործելաոճը եւ օրենքը, պարզապես, չեն հարգում։
Առաջին հայցն ավելի կարեւոր է, որովհետեւ եթե մենք դատարանով ապացուցենք, որ տվյալ նիստը եղել է ոչ իրավազոր եւ Ավինյանը ապօրինի քաղաքապետ է, ապա բոլոր այն որոշումները եւ հանձնարարականները, որը ստորագրել ե Տիգրան Ավինյանը, իբրեւ քաղաքապետ, կդառնան բողոքարկման ենթակա։ Այսինքն, բոլոր խայտառակ թանկացումները, չհիմնավորված հարկերը, տուրքերի վճարների բարձրացումները՝ բոլորը կդառնան բողոքարկման ենթակա եւ մենք հետեւողական կլինենք, որ դա տեղի ունենա։
Կարդացեք նաև
Երրորդը, ավագանու մեր անդամ Սոնա Աղեկյանին մանդատից զրկելու հայցն է, որը նույնպես մուտք ենք արել դատարան: Մենք վստահ ենք, որ սա եւս ապօրինություն է։ Իշխանական ավագանիները տարբեր պատճառաբանություններ էին բերում, իբրեւ նա եւ մյուս ավագանիները չէին աշխատում։ Բայց դա Սոնա Աղեկյանին չի վերաբերում, քանի որ նա շատ աշխատասեր ու ակտիվ է, եթե չասենք ամենաակտիվը։ Նա օրինակելի ավագանի էր եւ որպես ընդդիմադիր ավագանի փայլուն կատարում էր իր աշխատանք։ Ես կարծում եմ, որ նրան հենց դրա համար էլ հանեցին»,-ասաց Սամվել Հակոբյանը
Աշոտ ՀԱԿՈԲՅԱՆ
