ԵՄ-ն հրապարակել է Միության 2023 թվականի գործունեության արդյունքներն ամփոփող զեկույցը։ «ԵՄ-ն՝ 2023 թվականին» զեկույցը նկարագրում է հիմնական քաղաքական զարգացումները եւ թե ինչպիսի օգուտներ են դրանք բերել քաղաքացիներին ԵՄ-ում եւ արտերկրում:
Զեկույցի առաջին գլուխը նվիրված է Ռուսաստանի ագրեսիայի պայմաններում Ուկրաինային ԵՄ-ի աջակցությանը։
«Երկրորդ տարին անընդմեջ Եվրոպան միասնականորեն, ուժով եւ վճռականությամբ ամեն քայլափոխի պաշտպանել է Ուկրաինան։ Մենք հող նախապատրաստեցինք Եվրոպական միությունում ավելի քան 4 միլիոն ուկրաինացի փախստականների ընդունելու համար եւ կազմակերպեցինք վճռական ֆինանսական, հումանիտար եւ ռազմական օգնություն, որը ներկա պահին կազմում է ավելի քան 88 միլիարդ եվրո: Եվ մենք ցույց տվեցինք, որ կկանգնենք Ուկրաինայի կողքին այնքան ժամանակ, որքան պահանջվի»,- ասել է Եվրոպական հանձնաժողովի նախագահ Ուրսուլա ֆոն դեր Լեյենը զեկույցի նախաբանում։
Նա նաեւ հավելել է, որ Ուկրաինայի համար նոր հիմնադրամի միջոցով ԵՄ-ն առաջիկա 4 տարիների ընթացքում կտրամադրի եւս 50 միլիարդ եվրո՝ «օգնելու ապահովել հիմնական ծառայությունների տրամադրումը՝ բաց պահել դպրոցները, վճարել աշխատավարձեր եւ թոշակներ, քանի դեռ Ուկրաինայի ժողովուրդը շարունակում է պայքարել զավթիչների դեմ»:
Կարդացեք նաև
Զեկույցն անդրադառնում է նաեւ անցյալ տարվա «պատմական ընդլայնման փաթեթին», ըստ որի՝ 2023 թվականի ընթացքում Վրաստանը, Մոլդովան եւ Ուկրաինան ի ցույց են դրել ԵՄ-ին միանալու իրենց հանձնառությունը։
«Անդամակցության նրանց ուղին կանցնի դատական համակարգերի նպատակային բարեփոխումների, կազմակերպված հանցավորության դեմ պայքարի եւ քաղաքական դաշտը բարելավելու շարունակական ջանքերի միջոցով՝ կենտրոնանալով ապաօլիգարխիզացման եւ մարդու իրավունքների վրա»:
Ինչ վերաբերում է Արեւելյան գործընկերությանը, զեկույցում նշվում է, որ 17 միլիարդ եվրո արժողությամբ Արեւելյան գործընկերության Տնտեսական եւ ներդրումային ծրագիրը շարունակում է մնալ տարածաշրջանում կայունության ամրապնդման ԵՄ-ի հիմնական գործիքը: 2023 թվականի ավարտի դրությամբ մոբիլիզացվել էր ակնկալվող ներդրումներից 8,6 միլիարդ եվրոն, որից 5 միլիարդ եվրոն ուղղվելու է տարածաշրջանի երկրների հատուկ հիմնարար նախագծերին:
EU NEIGHBOURS east
