Հայոց եկեղեցին դարեր շարունակ կարեւոր դերակատարություն է ունեցել հայ ժողովրդի կյանքում: Մեր վանքերը եղել են հոգեւոր-մշակութային, կրթական, գիտական եւ գրչության կենտրոններ:
Այսօր եւս շարունակվում է Հայոց եկեղեցու լուսավորչական-կրթական առաքելությունը՝ ի դեմս Գարեգին Բ Ամենայն հայոց կաթողիկոսի:
Իր կենդանության օրոք Վեհափառ Հայրապետն արդեն իսկ ժողովրդի կողմից կնքվել է Շինարար տիտղոսով՝ Հայաստանի թեմերով մեկ ընթացող եկեղեցաշինական մեծածավալ գործունեության համար, իսկ Մայր Աթոռն անընդհատ ծաղկել եւ ընդարձակվել է: Սակայն, նա ոչ միայն Շինարար է, այլեւ Ոգու շինարար:
Դեռեւս Արարատյան Հայրապետական թեմի Առաջնորդական փոխանորդ եղած ժամանակ՝ 1990թ. հենց Գարեգին արքեպիսկոպոս Ներսիսյանի նախաձեռնությամբ է հիմնադրվել Սեւանի Վազգենյան հոգեւոր դպրանոցը:
Կարդացեք նաև
Ոգու շինարարությունն առավել մեծ թափ է ստացել, երբ Արարատյան Հայրապետական թեմի Առաջնորդական փոխանորդը 1999-ին ընտրվել է Ամենայն Հայոց Հայրապետ եւ ի թիվս այլնի՝ իր ուշադրության կենտրոնում պահել Գեւորգյան հոգեւոր ճեմարանը, որտեղ դիմորդները եռաստիճան կրթություն ստանալու հնարավորություն ունեն: Վեհափառ Հայրապետի նախաձեռնությամբ Գեւորգյան ճեմարանի շրջանավարտ միաբաններն ու քահանաներն իրենց բարձրագույն կրթությունը խորացնում են նաեւ արտասահմանյան հեղինակավոր համալսարաններում: Հայրենիք վերադարձածներն էլ շարունակում են իրենց ծառայությունը Մայր Աթոռի տարբեր կառույցներում, դասավանդում Գեւորգյան հոգեւոր ճեմարանում, կազմում եւ հրատարակում դասագրքեր:
Գոհար ՀԱԿՈԲՅԱՆ
