ՆԱՏՕ-ի գլխավոր քարտուղար Յենս Ստոլտենբերգը պաշտոնական այցով Երեւանում է։ Այսօր ՀՀ վարչապետի հետ հանդիպում-քննարկումից հետո նրանք հանդես են եկել հայտարարություններով:
«Բարձր եմ գնահատում ձեր անձնական առաջնորդությունը եւ այն, որ դուք հստակ արտահայտվում եք խաղաղության օգտին եւ միանշանակորեն հանձնառու եք ժողովրդավարական արժեքներին»,-ասաց Ստոլտենբերգը։
Նրա խոսքով՝ այսօրվա հանդիպման ժամանակ քննարկել են Հարավային Կովկասում կայունության կարեւորությունը․ «Սա կարեւոր է եվրոատլանտյան անվտանգության համար, քանի որ մենք կանգնած ենք ավելի վտանգավոր աշխարհի առջեւ։ Այսօր ՀՀ-ն ու Ադրբեջանը հնարավորություն ունեն տեւական խաղաղության հասնել տարիների հակամարտությունից հետո, ահա թե ինչու եմ ես երկու երկրներին կոչ անում համաձայնության հասնել, որն ուղի կհարթի հարաբերությունների կարգավորման համար եւ ձեր ժողովուրդների տեւական խաղաղության համար»։
Ստոլտենբերգն ասաց, որ ՆԱՏՕ-ն աջակցում է ՀՀ ինքնիշխանությանն ու տարածքային ամբողջականությանը ու ՀՀ-ի՝ խաղաղության ձգտումներին։
Կարդացեք նաև
«Ուկրաինայում Ռուսաստանի պատերազմը սթափեցնող հիշեցում է, որ չենք կարող խաղաղությունը չգնահատել։ Ես ողջունում եմ ձեր համերաշխությունն Ուկրաինայի հետ եւ ձեր գործընկերներին կոչ անում իրենցից կախված ամեն ինչ անել, որպեսզի Պուտինը չհաղթի ագրեսիայի իր պատերազմում։ Մարտադաշտում իրավիճակը մնում է ծանր, եւ հենց այս պատճառով պետք է ավելացնել մեր աջակցությունը։ Եթե Պուտինը Ուկրաինայում հաջողության հասնի, իրական ռիսկ կա, որ նրա ագրեսիան այնտեղ կանգ չի առնի, եւ ավտորիտար այլ սուբյեկտները կոգեշնչվեն դրանով»,-հայտարարեց ՆԱՏՕ-ի գլխավոր քարտուղարը։
Նրա խոսքով՝ այսօր ՀՀ վարչապետի հետ խոսել են Հայաստանի Հանրապետության ներքին բարեփոխումների առաջընթացի մասին․ «Ես ողջունեցի այն փաստը, որ դուք աշխատում եք ձեր ԶՈւ-ի նկատմամբ ժողովրդավարական վերահսկողությունն ամրապնդելու ուղղությամբ, այդ թվում՝ ՆԱՏՕ-ի բարեվարքության ամրապնդման ծրագրին ձեր մասնակցությամբ։ Դուք իրական հանձնառություն եք ցուցաբերել նաեւ կոռուպցիայի դեմ պայքարի հարցում, ժողովրդավարական ինստիտուտներն ուժեղացնելու եւ իրավունքի գերիշխանությունը պահպանելու հարցում»։
Նշենք, որ ՆԱՏՕ-ի գլխավոր քարտուղարը պաշտոնական այցով տարածաշրջանում է, նա մինչ ՀՀ ժամանելը, այցելել էր Բաքու եւ Թբիլիսի։
Մանրամասն՝ տեսանյութում
Պատրաստեց՝ Նելլի ԲԱԲԱՅԱՆԸ
