Ինչպես տեղեկացրել ենք, Հակակոռուպցիոն կոմիտեում քննվող քրեական վարույթի շրջանակում երեկ ձերբակալել էին չորս անձանց, որոնցից երկուսը Շիրակի մարզպետարանի պաշտոնյաներ են։ Մեկը քաղաքաշինության վարչության պետ Խաչատուր Խնձրցյանն է, մյուսը՝ նույն բաժնի մասնագետ Մկրտիչ Ասատրյանը։ Նրանք կասկածվում են կաշառք ստանալու մեջ։ Նրանց ձերբակալել էին հենց աշխատավայրից՝ Շիրակի մարզպետարանից՝ բավական լարված մթնոլորտ ստեղծելով պետական այս կառույցում։
Կաշառք տալու կասկածանքով ձերբակալել էին նաև շինարարական ընկերություններից մեկի ղեկավարին՝ Արտակ Ադամյանին, որը Սամվել Բալասանյանի պաշտոնավարման տարիներին ավագանու անդամ էր ու անչափ մոտ նախկին քաղաքապետի ընտանիքի հետ։ Նա, ըստ տեղեկությունների, այժմ էլ նույնքան մոտ է ՔՊ-ական որոշ շրջանակների հետ։
Aravot.am-ին հայտնի դարձավ, որ Արտակ Ադամյանին դատարանն ազատ է արձակել գրավի դիմաց, իսկ Շիրակի մարզպետարանի պաշտոնյաների համար որպես խափանման միջոց ընտրել երկամսյա կալանքը։
Նկատենք, սակայն, որ Շիրակի մարզպետարանի քաղաքաշինության վարչության մասնագետ Մկրտիչ Ասատրյանը խնամքին երկու փոքրիկ երեխաներ ունի՝ 2-3 տարեկան, նախկինում ինչպես նա, այնպես էլ Խաչատուր Խնձրցյանն արատավորված չեն եղել։
Կարդացեք նաև
Նունե ԱՐԵՎՇԱՏՅԱՆ
