«Հայաքվե» նախաձեռնության համակարգող Ավետիք Չալաբյանի ֆեյսբուքյան գրառումը
Միջազգային սոցիոլոգիական «ԳԵԼԼԱՓ» գործակալությունը աշխարհի մի շարք երկրներում ընդարձակ հարցում է անցկացրել, որտեղ ի թիվս այլ հարցերի, հարց է տրվել մասնակիցներին, թե արդյոք նրանք պատրա՞ստ են զենքով պաշտպանել հայրենիքը պատերազմի դեպքում:
Հայաստանում մասնակիցների 96%-ը դրական պատասխան է տվել, որը բոլոր երկրների մեջ բացարձակ ամենաբարձր արդյունքն է: Այն շահեկանորեն տարբերվում է Ադրբեջանից (88%) և Վրաստանից (83%), և վիթխարի կոնտրաստ է «խաղաղասեր» Ճապոնիայից (9%) կամ Իտալիայից (14%), որտեղ ժողովրդի մեծ մասը տառացիորեն պատրաստ չի պաշտպանել սեփական հայրենիքը:
Սա մեր ապագա հաղթանակների կարևորագույն գրավականն է: Մենք ունենք երկիրը պաշտպանելու պատրաստ, վճռական ժողովուրդ: Մեզ պետք է կամք ու առաջնորդություն՝ վերականգնելու մեր ժողովրդի հավատը սեփական ուժերի նկատմամբ, այսօր պաշտպանելու մեր երկիրը, իսկ վաղն արդեն վերականգնելու մեզնից խլվածը ու մեր հիմնարար մարդկային իրավունքները: Ով հակառակն է մտածում, չի վստահում մեր ժողովրդին, և նրան առաջնորդելու իրավունք չունի:
