Հայաստանի գիտությունների ազգային ակադեմիայի պատվավոր դոկտոր, քարտեզագետ Ռուբեն Գալեչյանը «Առավոտի» հետ զրույցում անդրադարձավ Հայաստանի տարածքի մասին Նիկոլ Փաշինյանի հայտարարություններին։
Փաշինյանն իր ասուլիսում հայտարարել էր, որ ԽՍՀՄ հանրագիտարաններից մեկի համաձայն՝ ՀՀ տարածքը 29 800 քկմ չէ։ «Տիտղոսին գրած է՝ 29 800, հետո պարզվեց, որ դա կլորացված թիվ է, տեքստի մեջ կա 29 հազար 743 քկմ»,- ասել էր նա։
«1926 թվականի քարտեզներում էլ Հայաստանի տարածքը գրված է 30 948 քկմ։ Դրան ի՞նչ կասեն։ Վարչապետը չպետք է հենվի նրա վրա, թե հանրագիտարանում ինչ է գրված։ Հանրագիտարանում մոտավոր թվեր են»,- մեզ հետ զրույցում ասաց Ռուբեն Գալեչյանը։
Անդրադառնալով Տավուշի մարզի 4 գյուղերը հանձնելու մասին Նիկոլ Փաշինյանի հայտարարություններին՝ քարտեզագետն ասաց․ «Նախքան այդ գյուղերի մասին խոսելը Ադրբեջանը թող դուրս գա իր բռնազավթած տարածքներից՝ Հայաստանի ինքնիշխան տարածքից, հետո կնստենք կխոսենք։ Առանց դա անելու ոչ մի բանակցություն չպետք է լինի։ Հայտնի չէ՝ որ գյուղերի մասին է խոսում, չորս գյուղ կա, որոնք անկլավների թվում են, դատարկ են, Բաղանիսն ու Այրումը հայկական գյուղեր են, մերն են, ճանապարհը մտնում Ադրբեջան դուրս է գալիս։ Մենք ոչինչ չպետք է հանձնենք Ադրբեջանին, մինչեւ ինքը դուրս չգա մեր տարածքներից, որտեղ մտել է»։
Կարդացեք նաև
Ռուբեն Գալեչյանը նաեւ ասաց, որ այսպես կոչված «անկլավների» համար իրավական հիմք գոյություն չունի։ «Ադրբեջանը երկու տարի առաջ ասաց՝ եթե Հայաստանն ասում է՝ ակնկալներն իրեն են, թող փաստաթուղթ ներկայացնի, որ դրանք իրենն են։ Մենք հակառակը պետք է ասենք՝ այդ տարածքները մեր տարածքի մեջ են, եթե ուրիշն ասում է՝ իմն են այդ տարածքները, թող ինքը փաստաթուղթը բերի ներկայացնի, թե ինչպես են իրենց հանձնվել այդ տարածքները։ Իրավական հիմք գոյություն չունի։ Այդ գյուղերը ԽՍՀՄ ժամանակաշրջանում Ադրբեջանին տրվել են ապօրինի ձեւով։ Սովետական շտաբը քարտեզի վրա գծել է, տվել է նրանց՝ առանց մեր հետ խորհրդակցելու»,- հավելեց մեր զրուցակիցը։
Ռոզա ՀՈՎՀԱՆՆԻՍՅԱՆ
