Անվտանգության խորհրդի քարտուղար Արմեն Գրիգորյանը հայտարարել էր, որ ռուս սահմանապահներին «Զվարթնոցից» հանելու մասին «Հայաստանը ՌԴ-ին տեղյակ պահել է պաշտոնական նամակով»: Այսօր վարչապետի ասուլիսի ժամանակ հարցրեցին՝ ե՞րբ է այդ գրությունը ուղարկվել, ի՞նչ փուլում է այդ գործընթացը ու միջազգային ատյաններում կա՞ ընդդեմ Ադրբեջանի բողոքներից հրաժարվելու հարց:
Փաշինյանը պատասխանեց. «ՀՀ սահմանապահ զորքերը նամակով դիմել են ՀՀ-ում ռուս սահմանապահ զորքերին, շնորհակալություն են հայտնել անկախությունից ի վեր սահմանային հսկողություն իրականացնելու հարցում ցուցաբերած աջակցության եւ մատուցված ծառայության համար, տեղեկացրել են, որ քանի որ մեր երկրում պետական ինստիտուտները զարգանում են ահա այս ողջ ընթացքում, այդ թվում նաեւ մեր ՌԴ գործընկերների աջակցությամբ, ՀՀ սահմանապահ ծառայությունը մասնավորապես «Զվարթնոց» օդանավակայանում բավարար փորձ, հմտություն ու հնարավորություն է ձեռք բերել, որպեսզի հսկողություն իրականացնի առանց ռուսական կողմի աջակցության: Նամակի բովանդակությունը այսպես է»:
Ինչ վերաբերում է բողոքները հետ վերցնելուն, Փաշինյանն ասաց. «Բանակցությունների ընթացքում այդպիսի հարց քննարկվել եւ քննարկվում է: Դա մի հարց է, որը կարող է քննարկվել ամենավերջում, երբ Խաղաղության պայմանագրի դրույթները արդեն իսկ համաձայնեցված կլինեն ու երկու կողմերը պատրաստ կլինեն այն ստորագրելու»:
Նա ասաց, որ բնական է, որ եթե կնքում են խաղաղության պայմանագիր, հետ վերցնեն բողոքը. «Ինչի են կողմերը դիմում միջազգային դատարաններ, երբ որեւէ ձեւով խնդիրները հասցեագրված չեն կամ կառավարելիության խնդիր ունեն: Երբ Խաղաղության պայմանագրի տեքստի շուրջ հասնում ենք համաձայնության, ես չեմ բացառում, նույնիսկ տրամաբանական կհամարեմ երկուստեք, խոսքը չի կարող լինել միայն ՀՀ-ի մասին, նաեւ նման լուծման գնալ»:
Կարդացեք նաև
Հռիփսիմե ՋԵԲԵՋՅԱՆ
