Էդմոն Մարուքյանը յութուբյան իր էջում խոսել է ՀՀ վարչապետի հատուկ հանձնարարություններով դեսպանի պաշտոնից ազատվելու որոշման մասին:
Սկսելով 2020 թվականի նոյեմբերի 9-ից եւ դրան հաջորդած իրադարձություններից՝ նա հասավ Հատուկ հանձնարարություններով դեսպանի պաշտոնը ստանձնելուն, որով, իր խոսքով, արտաքին քաղաքական դաշտում պետք է առաջ տաներ Հայաստանի նարատիվները:
Էդմոն Մարուքյանի ներկայացմամբ, խաղաղության շուրջ բանակցություններում հայկական կողմն ունեցել է իր կարմիր գծերը: «Հասկանալի լեզվով ասեմ, հայերը ապրում են Լեռնային Ղարաբաղում միջազգային երաշխիքների ներքո, դրա դիմաց Հայաստանը եւ Ադրբեջանը ճանաչում են միմյանց: Այսինքն, Հայաստանը չի ձգտում Լեռնային Ղարաբաղի ինքնորոշման հետապնդմանը, չի ձգտում ԼՂ անկախության ճանաչմանը, նշաձողը իջեցնում է, որպեսզի դրա դիմաց միջազգային հանրության աջակցությամբ ստանա ԼՂ ժողովրդի անվտանգությունը եւ Հայաստանի ինքնիշխան 29,8 քկմ տարածքի ճանաչումը, որպիսի հայտարարություն լինում է Պրահայի քառակողմ հանդիպման ժամանակ»,-ասաց նա:
Էդմոն Մարուքյանը նշեց, որ քանի որ Ադրբեջանը հրաժարվեց ճանաչել Հայաստանի ինքնիշխան տարածքը, որի դեպքում օկուպացիոն զորքերը պետք է դուրս գային Հայաստանի տարածքից, ամեն ինչը փլուզվեց: «Եվ ես հարցազրույցներից մեկում ասում եմ, որ ՀՀ բոլոր կարմիր գծերը խախտված են»,-ասաց նա եւ հավելեց, որ ինքն առաջարկել է , որ բանակցային գործընթացում մեր մոտեցումները պետք վերանայել ամբողջությամբ։
Կարդացեք նաև
Մարուքյանն ասաց նաեւ, որ ինքը շարունակում է կարծել, որ այն մտայնությունը, թե մենք միակողմանիորեն բարի կամք կդրսեւորենք, եւ Ադրբեջանը դա կգնահատի, չի աշխատել, չի աշխատում եւ չի աշխատելու: «Ես շարունակաբար նաեւ հրապարակային պնդել եմ, որ ԼՂ ժողովրդի իրավունքների խնդիրը չի կարող համարվել Ադրբեջանի ներքին գործը:
Իմ բանակցային ստրատեգիան տոտալ այլ է: Եվ բարոյական չէր լինի իմ կողմից՝ չկիսելով կարմիր գծերի փլուզման ժամանակաշրջանում ձեւավորված մոտեցումները՝ շարունակել մնալ այդ պաշտոնում: Եվ իմ կարծիքով ամենագեղեցիկ բարոյական քայլն այն էր, որ ես ուղղակի դուրս գայի: Գուցե ասեն, որ իմ տեսլականն էլ է սխալ: Բայց այն տեսլականը եւ այն մոտեցումները, որոնք իրականացվել են, նույն գործիքով այլ արդյունք, քան այն, ինչ ստացել ենք, դա էլ վստահաբար չի լինի»,-ասաց Էդմոն Մարուքյանը:
Աշոտ ՀԱԿՈԲՅԱՆ
Վայ ոնց? էինք անհամբեր սպասում, որ Մարուքյան էդմոնը նորից դառնա “կլասիկ ընդդիմադիր”։ Վերջ, հիմա նա ընդդիմադիր դաշտում նույնպես կգործի որպես հատուկ հանձնարարությունների գծով դեսպան և ընդդիմությանը կհաշտեցնի իր “մոլորյալ” վարչապետի հետ։
Իսկ եթե ավելի լուրջ – ապա էդմոնի շուստրիություններն արդեն բոլորը գիտեն և գիտեն նաև, որ նա եղել է բոլոր իշխանությունների հարազատ մարդը ընդդիմադիրի դիմակով։