2023 թվականին «Հաղարծին» ռեստորանահյուրանոցային համալիրի անչափահաս մատուցող Ա. Ա-ին ծեծի ենթարկելու դեպքով դեռեւս նախաքննության փուլում կողմերը հաշտության համաձայնության էին եկել, որի վերաբերյալ վարույթ իրականացնող մարմնին միջնորդություն՝ է ներկայացվել քրեական հետապնդումը Դիլիջանի քրեականի պետ Արսեն Ղայթմազյանի նկատմամբ դադարեցնել՝ հաշտության հիմքով:
«Զարմանալին այստեղ այն էր, որ միջնորդությունը վարույթ իրականացնող մարմնի կողմից չի քննարկվել այն դեպքում, երբ քրեական դատավարության օրենսգրքով իմպերատիվ սահմանված է, որ միջնորդությունները պետք է քննարկվեն ու որոշումներ կայացվեն, ինչպես նաեւ կողմերին հնարավորություն տրվի, եթե այդ որոշման հետ համաձայն չեն, այն բողոքարկեն վերադասության կարգով: Մեզ համար դեռ անհասկանալի պայմաններում՝ այդ միջնորդությունը չի քննարկվել, իսկ չքննարկելու վերաբերյալ տեղեկությունը ստացել ենք քրեական վարույթի նյութերին ծանոթանալու ժամանակ:
Քննիչի կողմից ու հսկողություն իրականացնող դատախազի կողմից թույլ է տրվել դատավարական էական խախտում, ինչը կբարձրաձայնենք դատարանում: Բայց այս գործի շրջանակներում այնքան խախտումներ կան, որոնց մասին հիմա չեմ խոսի։ Այսօր նախնական նիստ է նշանակված, որի ժամանակ միջնորդություն եմ ներկայացնելու քրեական հետապնդումը դադարեցնելու մասին. բավականին լուրջ խախտում է թույլ տրված այս անգամ դատախազական հսկողության իրականացման ընթացքում եւ տեսնենք՝ դատարանն ինչպիսի որոշում կկայացնի:
Եթե իրոք դատարանն արդարադատություն իրականացնի, պետք է որ իմ միջնորդությունը բավարարվի: Մեղադրական եզրակացությունը հաստատվել է ոչ պատշաճ դատախազի կողմից: Այսինքն՝ մեղադրական եզրակացությունը հաստատել է այն դատախազը, որը նման իրավասություն չուներ այս վարույթի շրջանակում։ Այլ փակագծեր չեմ կարող բացել, չեմ ուզում առաջ վազել, եթե այսօր դատական նիստը կայանա, այդ միջնորդությունը կներկայացնեմ»,- Aravot.am-ին ասաց Արսեն Ղայթմազյանի պաշտպան Աննա Մանթաշյանը:
Կարդացեք նաև
Հիշեցնենք, որ մատուցողին ծեծի էր ենթարկել Դիլիջանի քրեականի պետը՝ Արսեն Ղայթմազյանը:
Արփինե ՍԻՄՈՆՅԱՆ
