«Սպարապետը հայոց պատմության մեջ ազգային, պետական երեւույթ է: Ինչքան տարիները գնան, այնքան հայ ժողովուրդը զգալու է սպարապետ Վազգեն Սարգսյանի ֆիզիկական բացակայությունը»,- այսօր Եռաբլուրում լրագրողների հետ զրույցում շնորհավորելով Վազգեն Սարգսյանի ծննդյան 65-ամյակը՝ ասաց ՀՀԿ ԳՄ անդամ, ԱԺ նախկին փոխխոսնակ Էդուարդ Շարմազանովը:
Նա ասաց, որ եթե կան քաղաքացիներ, որոնք հավատարիմ են 88-ի շարժման գաղափարին, նրանք Սպարապետի գործը շարունակողներն են. «Վազգենի մեծությունը ինչի՞ մեջ է՝ նա մեր բանակի հիմնադիրն է: Իսկ այդ բանակն ո՞ւմ դեմ էր կռվում՝ ադրբեջանա-թուրքական հրոսակների դեմ՝ հանուն Հայաստանի ու Արցախի ազատագրության: Սրանք եկան, Վազգենի գործի հակապատկեր գործողություն արեցին, ճանաչեցին Արցախը Ադրբեջանի կազմում: Վազգեն Սարգսյանը հայկական Արցախի խորհրդանիշն է, Նիկոլ Փաշինյանը պարտության եւ Արցախը հանձնելու խորհրդանիշն է»:
Հարցին՝ Վազգեն Սարգսյանի եղբայրը՝ Արամ Սարգսյանն ասաց, որ պետք է ընդդիմությունն ու իշխանությունը համախմբված լինեն։ Շարմազանովն արձագանքեց. «Ես չեմ կարծում, որ դավաճանների, Արցախը հանձնողների, Արցախը հայաթափողների, Արցախը Ադրբեջանի կազմում ճանաչողների, հանուն «ոչնչի» 5000 զոհ տվողի շուրջ կարելի է համախմբվել: Չի կարող լույսը խավարի հետ համախմբվի, պատմության մեջ նման օրինակ չկա: Վազգենը լույսն է, Նիկոլը՝ խավարը»:
Շարմազանովը հիշեցրեց, որ Վազգեն Սարգսյանը փուլային տարբերակին դեմ էր, որ հանկարծ Արցախը չլինի Ադրբեջանի կազմում. «Նրա կյանքի ամենամեծ նպատակը եղել է Արցախի հայկականությունը: Պարզ հարց եմ տալիս՝ կա՞ մեկը, որ կարող է ասի՝ Վազգենը կհամակերպվեր Արցախն Ադրբեջանի կազմում ճանաչելու հետ։ Վազգենն ի՞նչ կաներ նրան, ով որ մտներ եթեր ու ասեր՝ դե Ադրբեջանը հարձակվել է Արցախի վրա, մենք չենք խառնվելու, մեզ չի հաջողվի ներքաշել պատերազմի մեջ: Ի՞նչ կաներ Վազգենը, առնվազն կթքեր էդ մարդկանց վրա»:
Կարդացեք նաև
Հռիփսիմե ՋԵԲԵՋՅԱՆ
