«Ներկա դրությամբ կուտակումներ չկան, ՀՀ զինված ուժերը ուշիուշով հետեւում են հակառակորդի շարժերին, այդպիսի կուտակումներ չկան: Օպերատիվ իրադրությունը գնահատվում է հարաբերական կայուն»,- այսօր Եռաբլուրում լրագրողների հետ զրույցում ասաց ԶՈՒ ԳՇ պետ Էդվարդ Ասրյանը՝ պատասխանելով հարցին, թե սպարապետ Վազգեն Սարգսյանի ազատագրածն ո՞վ պետք է պահեր, հիմա ի՞նչ ենք անում Սյունիքի ուղղությամբ, Գեղարքունիքի ուղղությամբ, երբ Սյունիքում զորքեր են կուտակում, Ներքին Հանդում 20-ից ավելի ադրբեջանական դիրքեր են տեղադրել:
Ինչ վերաբերում է Ներքին Հանդում ադրբեջանական դիրքերին, Ասրյանն ասաց. «Շփման գիծն իրենից ներկայացնում է մի այնպիսի կառուցվածք, որ ե՛ւ հակառակորդի, ե՛ւ մեր կողմից դիրքեր են տեղադրված: Ու եթե հակառակորդը ունի 20 դիրք, ապա երեւի այդքան էլ, քանակը չբացազատեմ, մենք ունենք»: Զարմանքին, որ խոսքը մեր ինքնիշխան տարածքում իրենց դիրքերի մասին է, ընդ որում, նույն իրավիճակը Ջերմուկում էր, Ասրյանն ասում էր՝ կհոգնեն, կգնան, բայց չհոգնեցին ու չգնացին՝ նա պատասխանեց. «ՀՀ զինված ուժերը ներկա դրությամբ կատարում են իրենց առջեւ դրված խնդիրները ու եթե դուք դա կասկածում եք, ապա այցելեք ու համոզվեք»:
Դիտարկմանը, որ հետ չեն շպրտվում, մինչեւ այսօր Ջերմուկում չեն հոգնել ու չեն գնացել՝ Ասրյանը հորդորեց այդ հարցը գրավոր ուղարկել ՊՆ, քանի որ պատասխանը գաղտնիություն է պարունակում. «Ուղարկեք հարցը մամուլի քարտուղարի միջոցով, ես բարեհամբույր ձեր հարցերին կպատասխանեմ»:
Ռուսական զենքի մատակարարման խնդիրների հետ կապված հարցը նույնպես Ասրյանը հորդորեց ուղարկել գրավոր:
Կարդացեք նաև
Հարցին՝ ՀԱՊԿ-ից դուրս գալը ինչի՞ կարող է հանգեցնել եւ մեր անվտանգային միջավայրը որքանո՞վ է փոխկապակցված ՀԱՊԿ-ի հետ՝ Ասրյանը պատասխանեց. «Մենք դեռեւս ՀԱՊԿ-ից դուրս եկած չենք, իսկ ՀԱՊԿ-ից դուրս գալը թե ինչի կհանգեցնի, այդ հարցը եւս գաղտնիք է պարունակում»:
Ճշգրտմանը՝ համատեղ կառուցվածքներ կան բանակում, ի՞նչ է լինելու դրանց հետ՝ ԳՇ պետը պատասխանեց. «Համատեղ կառուցվածքներ կան թղթի վրա»:
Հռիփսիմե ՋԵԲԵՋՅԱՆ
