«Խաղաղություն չի նշանակում պատերազմի բացակայություն։ Համապարփակ կարգավորումն այն է, որն ընկալվում է բոլոր կողմերից, բոլոր կողմերը պետք է ձգտեն իրական խաղաղության»,- Թուրքիայի Անթալիա քաղաքում դիվանագիտական համաժողովի ընթացքում անցկացված «Խաղաղություն, զարգացում և փոխկապակցվածություն Հարավային Կովկասում» պանելային քննարկման ժամանակ հայտարարեց Հարավային Կովկասի և Վրաստանում ճգնաժամի հարցերով ԵՄ հատուկ ներկայացուցիչ Տոյվո Կլաարը:
Նա կարևորեց ՀՀ-ի և Ադրբեջանի միջև հարաբերությունների կայուն կարգավորման հաստատումը, որը հիմք կծառայի ընդհանուր Հարավային Կովկասի տարածաշրջանի զարգացման համար․ «Սա պետք է ներառի ձեռք բերված պայմանավորվածությունները՝ կապված սահմանազատման հետ՝ հիմնված 1991-ի Ալմաթիի համաձայնագրի ստորագրությունների վրա։ Պետք է ապահովվի սահմանների բացումը մարդկանց և ապրանքների տեղաշարժի համար, ներառյալ Հայաստանի հարավով, որը կկապի Ադրբեջանի հիմնական մասը Նախիջևանին»։
Նա նաև հատուկ կարևորեց Թուրքայի դերակատարությունը տարածաշրջանում ու ասաց․ «Թեև եվրոպական երկրները և վերջերս Գերմանիան եղել են և շարունակելու են պատրաստ լինել աջակցություն տրամադրել, մենք նաև ակնկալում ենք Թուրքիայի և նրա առաջնորդության պոտենցիալի ներգրավումն այս տարածաշրջանում։ Թուրքիան Վրաստանի ու Հայաստանի անմիջական հարևանն է և ունի հատուկ հարաբերություններ Ադրբեջանի հետ։ Այս պատճառով Թուրքիան՝ որպես բացառիկ հնարավորություն պետք է օգնի խաղաղության հաստատմանը»։
Ըստ նրա՝ ՀՀ-ի և Ադրբեջանի միջև խաղաղության հաստատումը հնարավորություն կտա վերջապես կենտրոնանալ դրական օրակարգի վրա։ Նա հավելեց․ «Մենք այդ դեպքում վերջապես հնարավորություն կունենանք Հայաստանից դուրս բերել ԵՄ քաղաքացիական առաքելությունը»։
Կարդացեք նաև
Տաթև ՀԱՐՈՒԹՅՈՒՆՅԱՆ
