Փետրվարի 27-ին ԵՄ միջազգային հարաբերությունների հարցերով հանձնակատար Յուտա Ուրպիլայնենը ԵՄ բարձր ներկայացուցիչ Ժոզեպ Բորելի անունից ներկայացրել է Հայաստանի հետ գործընկերության նոր օրակարգը։
Համընդհանուր արժեքների վրա հիմնված օրակարգը կազմված է երեք հիմնական տարրերից։
Նախ՝ ԵՄ-ն ձգտելու է ամրապնդել Հայաստանի դիմակայունությունը եւ դիվերսիֆիկացնել նրա տնտեսությունը՝ առեւտրի, էներգետիկայի, կապի եւ ավիացիոն անվտանգության ոլորտներում համագործակցության ընդլայնման միջոցով: Հանձնակատարի խոսքով՝ ԵՄ-ն եւ Հայաստանը քննարկում են վիզաների ազատականացման երկխոսություն սկսելու տարբերակները՝ մարդկանց միջեւ շփումներն ակտիվացնելու համար:
«Հայաստանն այս հարցում մեծ հետաքրքրություն է արտահայտում, եւ մենք խրախուսել ենք նրա ղեկավարությանը ակտիվացնել համապատասխան բարեփոխումների ուղղությամբ աշխատանքը: Վիզաների ազատականացման երկխոսության մեկնարկը կարեւոր քաղաքական ազդակ կլինի Հայաստանի քաղաքացիներին եւ լծակներ կապահովի հետագա բարեփոխումների համար»,- ասել է Յուտա Ուրպիլայնենը։
Կարդացեք նաև
Երկրորդ․ ԵՄ-ն սպասում է Հայաստանում իր քաղաքացիական առաքելության (ԵՄԴԱ) ընդլայնմանը եւ քննարկում է Խաղաղության եվրոպական հիմնադրամի միջոցների հնարավոր օգտագործումը: «Մենք ընդլայնում ենք արտաքին եւ անվտանգության քաղաքականության շուրջ մեր երկխոսությունը՝ նաեւ ուսումնասիրելով ԵՄ–ի գլխավորած առաքելություններին եւ գործողություններին [Հայաստանի] մասնակցությունը»,- նշել է Ուրպիլայնենը:
Երրորդ․ հանձնակատարի խոսքով՝ «աճող ներդրումները առանցքային նշանակություն կունենան ավելի սերտ տնտեսական համագործակցության համար»: Նա հավելել է, որ ԵՄ-ն հավատարիմ է աջակցելու սեւծովյան էլեկտրահաղորդման մալուխի եւ տարածաշրջանային միակցվածության այլ նախագծերին Հայաստանի մասնակցությանը։
Նա եզրափակել է, որ ԵՄ-ի «ամուր հանձնառությունը Հայաստանի եւ Ադրբեջանի միջեւ հարաբերությունների կարգավորման գործընթացին մնում է անփոփոխ»:
