Անցյալ տարի Լեռնային Ղարաբաղի իրադարձություններից հետո Հայաստանն ու Ադրբեջանը երկու երկրների ղեկավարների և արտաքին հարաբերությունների գերատեսչությունների ղեկավարների մակարդակով հանդիպումներ չեն ունեցել, սակայն կողմերը շարունակել են մեկնաբանություններ փոխանակել խաղաղության պայմանագրի նախագծի վերաբերյալ. Մյունխենում պետությունների ղեկավարների հանդիպումը դրական առաջընթաց է, Անթալիայի դիվանագիտական ֆորումում ասել է Հայաստանի ԱԺ փոխխոսնակ Ռուբեն Ռուբինյանը՝ նշելով, որ երկու օր առաջ տեղի է ունեցել նաև Հայաստանի և Ադրբեջանի արտգործնախարարների հանդիպումը։
«Վերջին տարիներին Հայաստանն ու Ադրբեջանը տարբեր հարթակներում կարողացել են համաձայնության գալ խաղաղության հիմնարար սկզբունքների շուրջ։ Որո՞նք են այդ սկզբունքները, սա տարածքային ամբողջականության վերահաստատում է՝ հիմնված Ալամ-Աթայի հռչակագրի վրա։ Ուզում եմ հիշեցնել, որ այս հռչակագիրը հետխորհրդային երկու երկրների կողմից ընդունվել է Խորհրդային Միության փլուզումից հետո ։ Երկրորդ սկզբունքը, որի շուրջ մենք պայմանավորվել ենք, Հայաստանի և Ադրբեջանի միջև պետական սահմանի սահմանազատումն է՝ այս հռչակագրի հիման վրա։ Եվ ևս մեկ կարևոր հարց. մենք ասել ենք այն մասին, որ բոլոր տարածաշրջանային հաղորդակցությունները կաջակցվեն օրենքի, իրավահավասարության և իրավասության սկզբունքների հիման վրա։ Մենք կարծում ենք, որ եթե կարողանանք արդեն գոյություն ունեցող սկզբունքները տեղավորել խաղաղ բանակցություններում, ապա շատ լավ կարող ենք հասնել խաղաղության, և ես կարծում եմ, որ մենք կարող ենք դա անել բավականին արագ։ Ցավոք սրտի, չեմ կարող ասել, որ մինչ այժմ մենք կարողացել ենք դա անել։ Մեր կողմից մենք անում ենք հնարավոր ամեն ինչ Ալմա-Աթայի պայմանագրի սկզբունքներն արտացոլելու համար, սակայն Ադրբեջանի կողմից բավարար ջանքեր չենք տեսնում։ Հույս ունենք, որ կկարողանանք անհրաժեշտ արդյունքներ ստանալ»,- ասաց Ռուբեն Ռուբինյանը։
«Շատ ժամանակ այն բառերը, որոնք օգտագործում ենք, ցույց են տալիս մեր մոտիվացիան: Ինչո՞ւ է Հայաստանն իր նախաձեռնությունն անվանել «Խաղաղության խաչմերուկ», քանի որ ցանկանում ենք, որ մեր տարածաշրջանը լինի այդպիսին, մինչդեռ Ադրբեջանը շարունակում է օգտագործել «Զանգեզուրի միջանցք» տերմինը։
Երբ խոսում ենք ՀՀ սուվերեն տարածքի մասին, մենք չունենք այդպիսի ձևակերպում, ՀՀ-ում չկա Զանգեզուր անվանումով տարածքային միավոր։ Հայաստանը երբևէ չի ասել նման բան և չի համաձայնել Ադրբեջանին ինչ-որ լրացուցիչ միջանցքներ տրամադրել ՀՀ տարածքով»,- նշեց Ռուբինյանը։
Կարդացեք նաև
Հիշեցնենք՝ պանելային քննարկման թեման է «Խաղաղությունը, զարգացումն ու կապվածությունը Հարավային Կովկասում», որտեղ որպես բանախոսներ հանդես են գալիս ՀՀ ԱԺ փոխնախագահ Ռուբեն Ռուբինյանը, Ադրբեջանի նախագահի օգնական Հիքմեթ Հաջիևը, հայ-թուրքական հարաբերությունների կարգավորման գծով Թուրքիայի բանագնաց Սերդար Քըլըչը և Հարավային Կովկասում ճգնաժամի հարցերով ԵՄ հատուկ ներկայացուցիչ Տոյվո Կլաարը։
