ԱԺ հայտարարությունների ժամին ԱԺ նախագահ Ալեն Սիմոնյանն անդրադարձավ ընդդիմադիր պատգամավորների հայտարարություններին։
«Հայաստան» խմբակցության պատգամավոր Գեղամ Մանուկյանն իր ելույթում քննադատել էր Նիկոլ Փաշինյանի հայտարարությունը՝ արտագնա աշխատանքի մեկնողների կողմից հարկեր վճարելու անհրաժեշտության մասին։ Նա Փաշինյանի ձեւակերպումները արհամարհանք էր որակել սեփական ժողովրդի նկատմամբ։
Ալեն Սիմոնյանն ասաց, որ արտագնա աշխատանքի մեկնողների հարկելու նախաձեռնություն չկա, նման օրենք ընդունվել է մինչեւ 2018 թվականը։ «Բայց ես չեմ բացառում, որ նման օրենք կարող է լինել, որովհետեւ երբ մեր համաքաղաքացին երեխային ուղարկում է բանակ, այդ երեխան պետք է ունենա շոր, զենք, ճանապարհը, որով պետք է գնա, պետք է գոյություն ունենա։ Դուք՝ որպես քաղաքական գործիչ, պետք է ընդունեք, որ ՀՀ քաղաքացիները, մենք բոլորս պետք է հարկ վճարենք, որ մեր պետությունը գոյություն ունենա»,- ասաց նա։
Կարդացեք նաև
Ալեն Սիմոնյանն ասաց, որ Հայաստանում այսօր կա իդեալական ընդդիմություն։ «Ես շնորհակալություն եմ ձեզ հայտնում, դուք իդեալական ընդդիմություն եք։ Եվ եթե ՀՀ այսօրվա իշխանությունը, մենք դռները բաց թողնենք, գնանք, մեկ է, դուք իշխանություն չեք դառնա։ Հայաստանի Հանրապետության ժողովուրդը դա ձեզ թույլ չի տա։ Բոլոր այն մարդիկ, ովքեր այստեղ են, այլեւս իշխանություն դառնալու հնարավորություն չունեն, Դաշնակցությունը կարող է արանքը ճղել»,- ասաց նա։
Ռոզա ՀՈՎՀԱՆՆԻՍՅԱՆ
