ԱԺ նստաշրջանում «Պատիվ ունեմ» խմբակցության պատգամավոր Թագուհի Թովմասյանն անդրադարձավ արտագնա աշխատողներին հարկելու նախաձեռնությանը։ Նա, դիմելով ՊԵԿ նախագահ Ռուստամ Բադասյանին, ասաց․ «Մարդիկ վրդովված են այն որոշումից, որը կայացվել էր առանց իրենց հետ քննարկելու, եւ արդեն ԴԱՀԿ կողմից ուղարկվել էին հստակ պահանջներ։ Եվ բավական մեծ թվով գումարներ պետք է մարդիկ վճարեն։ Այս պահին քննարկումներն ի՞նչ փուլում են, մարդկանց մոտ կան վատ սպասումներ, ինչպե՞ս է հարցը լուծվելու, ի՞նչ ժամկետներում»։
ՔՊ խմբակցության պատգամավոր Բաբկեն Թունյանն ասաց․ «Չգիտեմ՝ դա միտումնավոր է արվում, թե ուղղակի տեղեկատվության պակասից, բայց կառավարությունը եւ Ազգային ժողովը որեւէ նոր կարգավորում, օրենքի փոփոխություն չեն կատարել, որով արտագնա աշխատանքի մեկնած մեր հայրենակիցները պիտի հարկվեն։ Այդ դրույթը, որ իրենք պետք է այնտեղ իրենց վճարած հարկի եւ այստեղի դրույքաչափի տարբերությունը վճարեն Հայաստանում, այդ դրույթը երկար տարիներ ի վեր գոյություն ունի։ Պարզապես այս ընթացքում այդ ուղղությամբ քայլեր չեն արվել։
Երկրորդ, մարդիկ չեն հարկվել, մարդիկ ուղղակի իրազեկվել են այդ դրույթի մասին։ Եվ առաջիկայում մենք նախապատրաստել ենք փոփոխություններ, որովհետեւ մենք էլ ենք հասկանում, որ եթե երկար ժամանակ օրենքի դրույթը չի կիրառվել, այդ ամեն ինչը միանգամից ուժի մեջ մտցնելը կարող է խնդիր դառնալ ու անսպասելի լինել մեր հայրենակիցների համար։ Խնդրում եմ՝ մեր հայրենակիցներին մեզնից մի պաշտպանեք, դրա անհրաժեշտությունը չկա, որովհետեւ մենք մեր հայրենակիցների եկամուտների ու բարեկեցության մասին ձեզնից պակաս չենք մտածում»։
ՊԵԿ նախագահ Ռուստամ Բադասյանն ասաց, որ e-draft համակարգում երեկվանից արդեն տեղադրված է Հարկային օրենսգրքում փոփոխություններ կատարելու նախագիծ, որով եթե օտարերկրյա պետությունում հարկի գումարը պահվել է հարկ վճարողից, ռեզիդենտության երկրում տարբերության մասով հարկը չեն կիրառում։
Կարդացեք նաև
«Սա անում ենք, որովհետեւ եթե տարիներ շարունակ այդ դրույթը չի գործել պրակտիկայում, որոշակի բողոքներում կա որոշակի օբյեկտիվ տարր»,- ասաց Բադասյանը։ Նրա խոսքով՝ Հարկադիր կատարումն ապահովող ծառայությունից որեւէ ծանուցում հարկ վճարողները չեն ստացել, իրենք ուղղակի ծանուցումներ են ուղարկել հարկային պարտավորությունների առկայության մասին։
Ռոզա ՀՈՎՀԱՆՆԻՍՅԱՆ
