ԱԺ ՔՊ խմբակցության պատգամավոր Գեւորգ Պապոյանը լրագրողների հետ ճեպազրույցում անդրադարձավ էկոնոմիկայի նախարարի պաշտոնում նշանակվելու հարցին։ «Ազգային ժողովում ունեի անելիք, բայց քաղաքական թիմը որոշել է, որ իմ պետական, հանրային ծառայությունն այս փուլում ես պետք է կատարեմ որպես էկոնոմիկայի նախարար։ Եվ ես այդ որոշումն ընդունել եմ ի գիտություն ու մեծ պատասխանատվությամբ»,- ասաց նա։
Ըստ Պապոյանի՝ քննարկվել է մի քանի թեկնածուների հարց, քննարկումների արդյունքում իր թեկնածությունն առաջադրելու որոշում է կայացվել։
Նա նշեց, որ իրականում պետական կառավարման համակարգը գրավիչ չէ։ Այն աշխատավարձը, որն ստանում է նախարարը, փոքր կամ միջին կազմակերպության միջինից մի փոքր բարձր մենեջերն է ստանում։ «Այո, այդպիսի աշխատավարձեր են մասնավոր համակարգում։ Դրա համար էլ պետական կառավարման համակարգը գրավիչ չէ։ Եթե գրավիչ է, գնանք հարցնենք որեւէ կազմակերպության ղեկավարի, ինքը կգա՞ կաշխատի նախարար, փոխնախարար, թե՞ ոչ։ Պետական ծառայությունը գրավիչ էր, իսկ ոչ գրավիչ լինելը տարբեր հանգամանքներով է պայմանավորված, միայն աշխատավարձով չէ, ամեն մարդ չէ, որ պատրաստ է, որպեսզի իրենք քննադատեն, քննարկեն, ոչ հաճելի հարցեր տան։ Ես բազմաթիվ մարդկանց եմ ճանաչում, որոնք կարող են լինել նախարար, փոխնախարար, վարչության պետ, բայց իրենք չեն գալիս»,- ասաց նա։
Գեւորգ Պապոյանը նշեց, որ առաջիկա օրերին դեռ իր նշանակումը չի լինի․ «ԱԺ կանոնակարգ օրենքը ԱԺ պատգամավորին տալիս է 7 օրյա ժամկետ։ Ես մանդատս վայր եմ դրել, ենթադրում եմ՝ ԱԺ նախագահն այսօր կանի համապատասխան հայտարարությունը, որի հետո 7 օրյա ժամկետ կա։ Այդ ժամկետից հետո, երբ մանդատս պաշտոնապես դրած կլինեմ, նոր հնարավոր կլինի այդ նշանակումը կատարել»։
Կարդացեք նաև
Ռոզա ՀՈՎՀԱՆՆԻՍՅԱՆ
