Aravot.am-ի տեղեկություններով՝ իրավապահները՝ Արմավիրի մարզի «Բարեկարգում» տնօրինության Վաղարշապատ համայնքի գերեզմանատների տնօրեն Համլետ Մանուկյանի կողմից կաշառք պահանջելու եւ ստանալու վերաբերյալ տեղեկություններ են ստացել: Ըստ այդ տեղեկությունների՝ Մանուկյանը ԱՄՆ-ից եկած մի քաղաքացու Արմավիրի մարզի Ոսկեհատ գյուղում գերեզմանատեղի տրամադրելու համար պահանջել եւ ստացել է 1000 ԱՄՆ դոլար:
Համլետ Մանուկյանը մեզ հետ զրույցում զարմացավ իրեն վերագրվող արարքից, ասաց՝ նման բան չկա ու չի կարող լինել. «Որովհետեւ մենք տեղերն անվճար ենք տրամադրում: Գերեզմանները նուրբ թեմա, է շատ են լինում նման խոսակցություններ, թե գումար են պահանջել, իրականում չկա նման բան: Ոչ մի բանից տեղյակ չեմ, բացառում եմ նման բան»:
Մեր զրուցակիցն ասաց, որ դեռ չի հարցաքննվել այդ գործի շրջանակում:
Կարդացեք նաև
Իրավապահներն օպերատիվ այլ տեղեկություններ էլ են ստացել, որ 2022թ. դեկտեմբերի կեսերին մեկ այլ քաղաքացու «Պետտնկարան» կոչվող գերեզմանատանը գերեզմանի տեղ հատկացնելու համար Համլետ Մանուկյանը պահանջել և ստացել է 200.000 ՀՀ դրամ գումար, իսկ գերեզմանատան շինարարության համար 2023թ. հունվար ամսին պահանջել և ստացել է 650.000 ՀՀ դրամ գումար: Գերեզմանի շինարարության ընթացքում այնուհետև հարևանությամբ գտնվող 3 մետր քառակուսի հողը գերեզմանին կցելու համար Մանուկյանը նշված քաղաքացուց ևս պահանջել և ստացել է 50.000 ՀՀ դրամ գումար:
Արփինե ՍԻՄՈՆՅԱՆ
Լուսանկարները՝ Համլետ Մանուկյանի ֆեյսբուքյան էջից
