Այսօր պլաստիկի շատ փոքրիկ մասնիկներն ամենուր են՝ դրանք հայտնաբերվել են Մարիանյան իջվածքից մինչև Էվերեստի գագաթին և նաև արդեն մարդու մարմնի ամենատարբեր հյուսվածքներում, անգամ՝ ընկերքում, որի մասին փաստում էր Scinece Direct ամսագրում 2021 թ․-ի հունվարին հրապարակված հետազոտությունը, որի շրջանակներում առաջին անգամ կնոջ ընկերքում միկրոպլաստիկ էր հայտնաբերվել։
Փետրվարի 17-ին Toxicological Sciences ամսագրում հրապարակված նոր հետազոտությունն ավելի ծավալուն տվյալներ է պարունակում։ Ինչպես հայտնել են Նյու Մեքսիկոյի համալսարանի հետազոտողները, 62 կանանցից վերցված ընկերքային հյուսվածքի բոլոր նմուշներում պլաստիկի միկրոսկոպիկ մասնիկներ են հայտնաբերվել 1 գրամ հյուսվածքին 6,5 -790 միկրոգրամ խտությամբ։ Իհարկե, այս քանակը շատ փոքր է առողջության վրա գործող ազդեցության մասին խոսելու համար, սակայն ստացված տվյալներն անհանգստության տեղիք են տալիս։
Ինչպես նշել է հետազոտության առաջատար մասնագետ Մեթյու Կամպենը․ «Չափաբաժինը թույն է ստեղծում։ Եթե այն սկսի աճել, ապա մենք պետք է անհանգստանանք։ Եթե ընկերքի վրա ազդեցությունը դառնա նկատելի, դա կարող է ազդել սաղմի հետագա ողջ կյանքի վրա»։
Միկրոպլաստիկ են համարվում շրջակա միջավայրում առկա պլաստիկե առարկաների քայքայման հետևանքով առաջացած 5 մմ-ից փոքր մասնիկները։
Նշենք, որ հայտնաբերված պլաստիկե միկրոմասնիկների 54%-ը կազմել է պլաստիկ շշերի ու տոպրակների կազմում առկա պոլիէթիլենը, պոլիվինիլ հայտնաբերվել է 10% չափաքանակով։
Կարդացեք նաև
Հետազոտողները միկրոպլաստիկի՝ օրգանիզմ ներթափանցման 2 հիմնական ուղի են նշում՝ կուլ տալու և շնչելու միջոցով։ Այսօր բազմաթիվ տվյալներ կան, որոնց համաձայն սնունդն ու ջուրը աղտոտված են միկրոպլաստիկով։
Թե ինչպես են պլաստիկի նանոմասնիկները թափանցել ընկերքի մեջ, դեռևս հայտնի չէ․ որոշ չափով սպասելի է այդ մասնիկների հայտնվելը մարդու օրգանիզմի այլ հյուսվածքներում, բայց դրա համար բավականին երկար ժամանակ է հարկավոր, իսկ ընկերքն աճում է սահմանափակ ժամանակամիջոցում։ Ուստի հետազոտողները պլանավորում են շարունակել խնդրի ուսումնասիրումը, քանի որ այն գնալով մեծանում է և սպասվում է, որ յուրաքանչյուր 10-15 տարին մեկ միկրոպլաստիկի քանակությունն օրգանիզմում կրկնապատկվելու է։
Պատրաստեց Մարինե ԱԼԵՔՍԱՆՅԱՆԸ
