Կառավարության այսօրվա նիստում վարչապետ Նիկոլ Փաշինյանն անդրադառնալով արտագնա աշխատանքի մեկնողների այն դժգոհություններին, որ նրանք ՌԴ-ում եկամտային հարկ են վճարել, մի հատ էլ ՀՀ-ում են պահանջում վճարել ՌԴ-ի եւ ՀՀ-ի եկամտային հարկի տարբերությունը, ասաց՝ հարկ վճարելու նկատմամբ մեր վերաբերմունքը պետք է փոխել, եւ սա վերաբերում է նաեւ շոու-բիզնեսի ներկայացուցիչներին։
«Շոու-բիզնեսի ներկայացուցիչները պետք է վճարեն հարկերը։ Ո՞նց կարա էդպես լինի, որ չվճարեն։ Չվճարելու դեպքում օրենքով սահմանված կարգով պետք է պատասխանատվություն կրեն։ Ասում են՝ Լոս-Անջելեսում գնացել, համերգ ենք տվել։ Բա որտեղի՞ց եք մեկնել Լոս-Անջելես, ի՞նչ ճանապարհով եք գնացել։ Դե ուրեմն, Հայաստանում հարկ վճարած քաղաքացիների հաշվին կառուցած ճանապարհից մի՛ օգտվեք: Ճանապարհի կողքի ճանապարհներով գնացեք, հնձեք այդ եղեգները, ու տենց գնացեք, հասեք օդանավակայան:
Էս ի՞նչ վերաբերմունք է ընդհանրապես։ Ես խոսում եմ այն դեպքերի մասին, երբ օրենսդրությամբ է սահմանված, խոսքը կրկնակի հարկման մասին չէ։
Բայց ասել, որ ես Ամերիկայում տոմս եմ վաճառել, էստեղ հարկ ինչո՞ւ պետք է վճարեմ, էլի եմ ասում՝ օրենքով նախատեսված դեպքերում, սխալ է, ուրեմն օդանավակայանից պիտի ասենք՝ ուրեմն, էս ճանապարհները ձեզ համար չեն, գնացեք Երեւան հասնելու ուրիշ ճանապարհ գտեք, Զանգվի ձորով, բնաշխարհը վայելելով, ոտ-ոտ եկեք, հասեք Երեւան։ Իհարկե, սա գրոտեսկով եմ ասում»,-ասաց Փաշինյանը։
Կարդացեք նաև
Մանրամասն՝ տեսանյութում
Նելլի ԲԱԲԱՅԱՆ
