«Խորապես ոգեւորված եմ այս երեկո տեսնել այսքան հիանալի հյուրերի: Ցանկանում եմ սրտանց իմ երախտագիտությունս հայտնել ձեր մասնակցության համար այս ընդունելությանը որը նվիրված է Նորին Մեծություն կայսեր ծննդյան 64-րդ տարեդարձին»,-ասաց Հայաստանում Ճապոնիայի արտակարգ և լիազոր դեսպան Աոկի Յուտական Ճապոնիայի Ազգային տոնի՝ Կայսեր ծննդյան օրվա առիթով կազմակերպված ընդունելության ժամանակ:
Դեսպանը, որ հունվարին է հավատարմագրերը հանձնել ՀՀ նախագահին, նշեց, որ արդեն զգացել է հայ ժողովրդի հյուրընկալությունը, նաեւ վստահ է, որ Ճապոնիան եւ Հայաստանը ունեն շատ ընդհանրություններ՝ սկսած հարուստ պատմությունից, մինչեւ գեղեցիկ բնությունն ու մշակույթը, ավանդույթները: «Ճապոնիայում ես վայելում էի Ֆուջի լեռան տեսարանը իմ պատուհանից: Երբ ինքնաթիռս ժամանում էր Հայաստան, առաջին բանը, որ տեսա, Արարատ լեռն էր, որը հայերի համար նույնքան խորհրդանշական լեռ է, ինչպես Ֆուջին՝ ճապոնացիների համար»:
Դեսպանի ձեւակերպմամբ, Ճապոնիան եւ Հայաստանը գործընկերներ են, որոնք կիսում են ժողովրդավարության, օրենքի գերակայության եւ մարդու իրավունքների հիմնարար արժեքները:
Կարդացեք նաև
«Կցանկանայի ընդգծել, որ Ճապոնիայի կառավարությունը մնում է Հայաստանի կողքին եւ կշարունակի աջակցել երկխոսության միջոցով այս տարածաշրջանի հետ կապված խնդիրների խաղաղ ճանապարհով լուծելու ուղղությամբ Հայաստանի ջանքերին»,-ընդգծեց Հայաստանում Ճապոնիայի արտակարգ և լիազոր դեսպանը:
Նա ի թիվս այլնի, հույս հայտնեց, որ Հայաստանը 2025-ին կմասնակցի Օսակայի միջազգային ցուցահանդեսին եւ կներկայանա ողջ հմայքով ու բոլոր ուղղություններով: Անդրադարձ կատարվեց Ճապոնիայի՝ Հայաստանին տրամադրված ֆինանսական աջակցությանը, դժվարին պահերին սատար կանգնելուն եւ ամրապնդվող բարեկամությանը:
Նշենք, որ ընդունելության սկզբում ՀՀ եւ Ճապոնիայի օրհներգերը կատարեց «Հովեր» կամերային երգչախումբը (գեղարվեստական ղեկավար՝ Սոնա Հովհաննիսյան): Սրահի մուտքի մոտ ներկայացված էին օրիգամի արվեստի նմուշներ, որոնց հեղինակը Արթուր Կարապետյանն էր, սրահում տեղադրված էր լուսանկարչական տաղավար՝ Կիոտոյի Ոսկե տաճարի տեսարանով, որտեղ մարդիկ կարող էին լուսանկարվել:
Նաեւ եղավ այկիդո ճապոնական մարտարվեստի ցուցադրություն՝ ՀՀ Այկիդոյի հայկական ասոցիացիայի նախագահ Արմեն Ավետիսյանի եւ այլոց մասնակցությամբ:
Գոհար ՀԱԿՈԲՅԱՆ
