«Վերահաստատում ենք մեր պատրաստակամությունը քաղհասարակության պլատֆորմի հետ երկխոսության շուրջ և ինստիտուցիոնալ դարձնելու հարցում»,- ԵՄ-Հայաստան քաղաքացիական հասարակության պլատֆորմի ամփոփիչ զեկույցի ներկայացման միջոցառման բացման խոսքում հայտարարեց ՀՀ փոխվարչապետ Մհեր Գրիգորյանը։
Նա շեշտեց՝ ՀՀ կառավարությունն այս ժամանակահատվածում մեծապես կարևորում է որոշումների կայացման գործընթացում քաղհասարակության մասնակցությունը և օբյեկտիվ գնահատականները։
Փոխվարչապետը նշեց, որ բավարարված են Երևանի և Բրյուսելի կառույցների միջև տեղի ունեցող զարգացումներով և փոխգործակցության քննարկումներով ու ասաց․ «Վերջին շրջանում դա անցում է կատարել ինտենսիվ փուլ և դրա սպասարկումը ենթադրում է հանրության լայն շերտերի ներգրավում և ակտիվ մասնակցություն»։
Փաստելով, որ այս միջոցառումը տեղի է ունենում ՀՀ-ԵՄ գործընկերության խորհրդի նիստից հետո և որի արդյունքներով երկուստեք արձանագրվել է առաջընթաց, Մհեր Գրիգորյանն ասաց՝ ԵՄ-ն բարձր է գնահատել ձեռք բերված առաջընթացը։ Նաև շեշտեց՝ կարևոր է զեկույցում մատնանշված բացերի ու խնդիրների վերհանումը․ «Կարևորում ենք նաև համաձայնագրի կիրարկման շուրջ այսօր պլատֆորմի կողմից ներկայացված զեկույցը։ Մեզ համար կարևոր են զեկույցում մատնանշված բացերի ու խնդիրների վերահանումը։ Վստահեցնում եմ, որ դրանք հաշվի են առնվելու մեր համատեղ աշխատանքներում՝ մշտադիտարկման և հաղորդակցության մեխանիզմների կատարելագործման գործընթացում։ Եվրոպայի հետ ունեցած մեր ընդհանուր արժեհամակարգի մասին իրազեկման բարձրացման գործում անփոխարինելի է քաղհասարակության ու մասնավորապես այս պլատֆորմի դերը։ Հավատացած ենք, որ CEPA-ն (Հայաստան-ԵՄ համապարփակ և ընդլայնված գործընկերության համաձայնագիր․–խմբ․) մեր քաղաքացիների կողմից պետք է որպես իրենց սեփականություն դիտարկվի, և դրան հասնելու համար համատեղ ջանքեր գործադրենք՝ շարունակելով կառուցողական երկխոսությունը և ավելացնելով հաշվետվողականության աստիճանը»։
Կարդացեք նաև
Տաթև ՀԱՐՈՒԹՅՈՒՆՅԱՆ
