2024 թվականի փետրվարի 13-ին փոխվարչապետ Մհեր Գրիգորյանի նախագահությամբ տեղի է ունեցել Վարչապետի 2021 թվականի դեկտեմբերի 17-ի թիվ 1443-Ա որոշմամբ ստեղծված Մարդու իրավունքների եվրոպական կոնվենցիայով ստանձնած միջազգային պարտավորությունների իրականացման աշխատանքները համակարգող միջգերատեսչական հանձնաժողովի լիագումար նիստը: Նիստին որպես հրավիրյալ մասնակցել են նաև օրենսդիր, դատական իշխանության և տեղական ինքնակառավարման մարմնի ներկայացուցիչներ:
Փոխվարչապետ Գրիգորյանն ընդգծել է բոլոր գերատեսչությունների ու շահագրգիռ մարմինների համագործակցության ու համակարգված աշխատանքի անհրաժեշտությունը ներպետական իրավական համակարգում մարդու իրավունքների միջազգային չափանիշների ներդրման հարցում:
Նիստի ընթացքում Միջազգային իրավական հարցերով ներկայացուցիչ Եղիշե Կիրակոսյանը ներկայացրել է ՀՀ վերաբերյալ ՄԻԵԴ վճիռների և որոշումների կատարման գործընթացը և առկա խնդիրները: Քննարկվել են զինված ուժերի մարդու իրավունքների պաշտպանության, կալանքի՝ որպես խափանման միջոցի հիմնավորվածությանն առնչվող, բժշկական անփութության, քրեակատարողական հիմնարկներում բուժսպասարկման տրամադրման, խտրականության արգելքի, դատական ակտերի չկատարման և մի շարք այլ օրակարգային հարցեր:
Որոշվել է հանձնաժողովի հետագա աշխատանքները կազմակերպել ըստ արձանագրված խնդիրների ձևավորված ենթախմբերով՝ ապահովելու խախտումների վերացմանն ու կանխարգելմանն ուղղված թիրախային լուծումների մշակումը:
Կարդացեք նաև
ՀՀ կառավարություն
