Արմեն Մազմանյանի անվան բեմարվեստի ազգային փորձարարական «Գոյ» կենտրոնի անձնակազմը դեմ է իրենց թատրոնը լուծարելուն եւ Գ. Սունդուկյանի անվան թատրոնի հետ միանալուն: Գործն էլ դատական փուլում է գտնվում: Փետրվարի 19-ին Արաբկիր եւ Քանաքեռ-Զեյթուն վարչական շրջանի ընդհանուր իրավասության դատարանում նշանակված էր դատական նիստը:
Aravot.am-ի հետ զրույցում «Գոյի» թատրոնի գլխավոր ռեժիսոր եւ գեղարվեստական ղեկավար Արթուր Սահակյանը հետեւյալը հայտնեց. «Դատարանն ասել է, թե իր իսկ վարույթի գործը չէ: Իսկ մինչ այդ ասել էին, որ սա ընդհանուր իրավասության դատարանի գործն է, հիմա էլ ասում են՝ պետք է ուղղել վարչական դատարան…Մի խոսքով, այս գործը վարույթ չեն ընդունում, ամեն կերպ խոչընդոտում են…»:
Արթուր Սահակյանը տեղեկացրեց, որ իրենց փաստաբանը կրկին Կարո Ասատրյանն է, ով հունվարի 15-ին անակնկալ կերպով տեղեկացել էր, որ իր լիազորությունները դադարեցվել են. «Գոյը» պետռեգիստրում ապօրինաբար հանել են գրանցումից… Գործը դեռ դատարան չընդունած, իրենք ինչ-որ գործողություն արեցին ու «Գոյը» հանեցին, բայց «Գոյի» անձնակազմը հավաքվեց եւ Կարո Ասատրյանին նշանակեց իր շահերի ներկայացուցիչ: Հիմա նորից Կարոն է մեր փաստաբանը, ում հետ փորձում ենք այս պատը ճեղքել»:
«Գոյի» գեղարվեստական ղեկավարից հետաքրքրվեցինք՝ որեւէ լուր ունե՞ն ԿԳՄՍ նախարարության կողմից անսպասելի նշանակված նոր տնօրեն Կարեն Սիմոնյանից, որին «Գոյի» անձնակազմը անվստահություն էր հայտնել:
Կարդացեք նաև
«Ոչ մի լուր, բացարձակ ոչ մի ձայն, ոչ մի բան, անգամ կասկածներ ունեմ, որ գուցե իր հետ ինչ-որ վատ բան է պատահել, որ ծպտուն չկա»,-ասաց մեր զրուցակիցը:
«Գոյի» գլխավոր ռեժիսոր եւ գեղարվեստական ղեկավար Արթուր Սահակյանն ընդգծեց, որ «Գոյը» չի ընկրկելու ու գնալու է մինչեւ վերջ. «Ճար չունենք մենք կոտրվելու, կոտրվենք, ի՞նչ անենք: Իրենց ուզածն էլ դա է: Մենք այլ տարբերակ չունենք, պիտի կռվենք ու կռվենք»:
Գոհար ՀԱԿՈԲՅԱՆ
