Բաց նամակ ՀՀ գլխավոր դատախազին
ՀՀ գլխավոր դատախազ տիկին Վարդապետյան, ստորև հարցս հռետորական չէ՛, այն պահանջում է տրամաբանորեն հիմնավորված պատասխան
Հոկտեմբերի 27-ի քրեական վարույթի նախաքննությունը ՀՀ դատախազության որոշմամբ հանձնվել է ՀՀ հակակոռուպցիոն կոմիտեին՝ քննարկելու նպատակով:
Սույն թվականի փետրվարի 5-ին որոշ հարցերի վերաբերյալ միջնորդություն էի ներկայացրել ԱԱԾ-ի տնօրեն պարոն Աբազյանին: Քիչ առաջ ԱԱԾ օպերատիվ գործունությանն աջակցման ծառայությունից ստացել եմ պատասխան, որից, մեղմ ասած, ցնցված եմ: Դրանում ինձ աչքալուսանք են տալիս, որ 2022թ. հուլիսի 1-ին գործողության մեջ դրված ՀՀ քրեական դատավարության օրենսգրքի փոփոխությունների համաձայն ՀՀ ԱԱԾ քննչական մարմնի գործառույթները 2024թ. հունվարի 1-ից փոխանցվել են ՀՀ քննչական կոմիտեին և այդ հանգամանքով պայմանավորված ԱԱԾ քննչական գլխավոր վարչությունում իրականացված քրեական վարույթներն ուղարկվել են ՀՀ գլխավոր դատախազություն, որտեղ էլ որոշվել է Հոկտեմբերի 27-ի քրգործի անջատված մասի վարույթի նախաքննությունն ուղարկել հակակոռուպցիոն կոմիտե:
Կարդացեք նաև
Հիշեցնեմ, որ ինքս ի սկզբանե դեմ եմ եղել այս գործի վարույթը ԱԱԾ-ին հանձնարարելուն, չեմ վստահել, որովհետև ԱԱԾ-ն է հոկտեմբերի 27-ի գործը սարքողն էլ, կոծկողն էլ, «ծռողն» էլ:
Դիտեք ինձ հետ այս հարցազրույցը, որտեղ ասածս հիմնավորել եմ: Բայց գործը տրվեց ԱԱԾ-ին, 4 տարին անցել է, ոչ միայն հասարակությունը, այլև ես՝ որպես դիմումատու, ոչինչ չգիտեմ ընթացքի մասին:
Ես իրավաբան չեմ, իրավական հարցերում ճիշտ ու սխալը չեմ կարող մեկնաբանել, բայց շատ կուզենայի լսել ՀՀ գլխավոր դատախազ տիկին Վարդապետյանի բացատրությունն այն մասին, թե ի՞նչ հիմնավորմամբ է 1999թ. հոկտեմբերի 27-ին մե՛ր Ազգային Ժողովում մե՛ր պետության դեմ կատարված պետական ահաբեկչության կազմակերպիչների և հովանավորների մասով քրեական վարույթի նախաքննությունը հանձնարարվում քննել ՀՀ հակակոռուպցիոն կոմիտեին:
Ի՞նչ կապ ունի կոռուպցիայի դեպքերի բացահայտման ուղղությամբ գործող մարմինը պետական ահաբեկչության կազմակերպիչների և հովանավորների բացահայտմանն ուղղված քրեական նախաքննության հետ:
Ի՞նչ է ենթադրում ՀՀ գլխավոր դատախազի այս որոշումը, այս հարցս հռետորական չէ՛, այն պահանջում է տրամաբանորեն հիմնավորված պատասխան, որից հասկանալի կլինի, թե այս քաղաքական իշխանությունը որքանով է պատրաստ իսկապես բացահայտելու հոկտեմբերի 27-ի ՊԵՏԱԿԱՆ ԱՀԱԲԵԿՉՈՒԹՅՈՒՆԸ: Այն չի՛ կարող կրկնվել, պետք է բացառել ցանկացած պետական ահաբեկչություն, իսկ դրա համար պետք է դատարանի առաջ կանգնեն մեր ՊԵՏՈՒԹՅԱՆ ՆԵՐՔԻՆ ԹՇՆԱՄԻՆԵՐԸ, ԻՍԿ ԱՐՏԱՔԻՆ ԹՇՆԱՄՈՒՆ ԲԱՑԱՀԱՅՏԵԼ Է ՄԵՐ ՊԵՏՈՒԹՅԱՆ ԱՅՍՕՐՎԱ ԻՐԱԿԱՆՈՒԹՅՈՒՆԸ:
Անահիտ ԲԱԽՇՅԱՆ
19.02.2024թ.
