Եղիշե Չարենցի տուն-թանգարանում կայացավ «Ծիլ 2023» գրական-ստեղծագործական մրցույթի ամփոփումը: Այս տարի մրցույթը բացի ստեղծագործական եւ գրական ուղղվածությունից, ունեցել է նաեւ փաստահավաք առաքելություն՝ ներառելով «2023 թ. սեպտեմբերն Արցախում. ականատեսի աչքերով» կամ «2023 թ. սեպտեմբերը Մայր Հայաստանում. ականատեսի աչքերով» թեման: «Կամք» եւ «Հառնում» վերնագրերի ընտրությունը պայմանավորված էր նրանով, թե որտեղ է այդ իրադարձություններին անձամբ ականատես եղել մասնակիցը:
Ցուցադրվում էին «Լուսանկար» անվանակարգում ամենաբարձր միավորներ հավաքած աշխատանքները, որոնք վավերագրել էին Արցախում վերջին օրերը եւ գաղթի ճանապարհը: Միջոցառման հյուրերը հնարավորություն ունեցան տեղում քվեարկել լավագույն լուսանկարի օգտին, եւ հաղթող մասնակիցը ստացավ հավելյալ դրամական պարգեւ։ Մրցանակաբաշխությանը ներկա էին ժամանակակից գրողներ, ռեժիսորներ, լուսանկարիչներ, պատկառելի կառույցների ներկայացուցիչներ։ Մրցույթի տարածմանն աջակցել էին Հայաստանի գրողների միությունը, «Մարզերի երեխաները՝ մարզերում» կառույցը, գրադարաններ, թանգարաններ:
Կարդացեք նաև
Մրցույթում հաղթած մասնակիցները ստացան դրամական պարգեւներ՝ «Ամրոց» հիմնադրամի կողմից, որն ի թիվս «Ծիլ» ծրագրի՝ մեկնարկում, ֆինանսավորում եւ համաֆինանսավորում է ազգային արժեքների պահպանմանն ուղված բազմաթիվ ծրագրեր։
Հասմիկ ԻԳԻԼԻԶՅԱՆ
«Ծիլ» ծրագրի հանրային կապերի պատասխանատու
