Հայաստանի Հանրապետության ԱԳՆ կայքից անհետացել է «Լեռնային Ղարաբաղի հիմնախնդիր» բաժինը բոլոր չորս լեզուների` հայերեն, ռուսերեն, անգլերեն եւ ֆրանսերեն էջերից:
ՀՀ ԱԳՆ-ի պաշտոնական էջից հեռացվել է նաև Արցախի Հանրապետության մարդու իրավունքների պաշտպանի զեկույցներ բաժնի բովանդակությունը։
Նկատենք, որ բառացիորեն մի քանի օր առաջ` փետրվարի 9-ին, Ադրբեջանի նախագահ Իլհամ Ալիևի հատուկ հանձնարարություններով դեսպան Էլչին Ամիրբեկովը «Ազատությանն» ասել էր, թե Անկախության հռչակագրից բացի Բաքուն խնդիրներ է տեսնում նաև Հայաստանի ընդունած այլ փաստաթղթերում:
Ադրբեջանցի բարձրաստիճան դիվանագետը ռադիոկայանի թղթակից Ջոշ Կուչերայի հետ զրույցում պնդել էր՝ այդ հարցերը բազմիցս են բարձրացվել հայկական կողմի հետ շփումներում։ «Այո, բազմաթիվ անգամներ մենք հայկական կողմի ուշադրությունն ենք հրավիրել այդ փաստերին՝ մեր դեմ առ դեմ հանդիպումներում, ինչպես նաև փաստաթղթերի փոխանակման ժամանակ», – ասել էր նա՝ մատնացույց անելով կոնկրետ փաստաթղթեր։ Օրինակ՝ այն վերապահումները, որ Հայաստանի խորհրդարանն ընդունել է Ալմա-Աթայի հռչակագիրը վավերացնելիս։
Կարդացեք նաև
Պարզվեց, որ ավելի քան 30 տարի առաջ ընդունված այս փաստաթղթից բացի պաշտոնական Բաքվի համար վիճահարույց էր նաև Հայաստանի արտգործնախարարության պաշտոնական կայքը, որտեղ Ղարաբաղյան խնդրին նվիրված հատվածում ասվում է, թե Արցախը պատմական Հայաստանի անբաժանելի մասն է։ Ամիրբեկովը նկատել էր. «Հայկական կողմն ընդունում է, որ սա է իրականությունը, բայց ոչինչ չի արվում այդ փաստերը մեղմելու համար»։
Ադրբեջանի նախագահ Իլհամ Ալիևի հատուկ հանձնարարություններով դեսպանի դժգոհությունից չորս օր անց ՀՀ ԱԳՆ-ի կայքից անհետացել է Լեռնային Ղարաբաղի հիմնախնդիր բաժինը:
