Երեւանի քաղաքապետարանը շրջանառության մեջ է դրել տրանսպորտի ուղեվարձը թանկացնելու նախագիծ:
Հաշվի առնելով, որ ՔՊ պատգամավոր Հովիկ Աղազարյանն իր հարցազրույցներում ընդգծում էր, որ ինքը շարքային քաղաքացու պես օգտվում է հանրային տրանսպորտից, ավտոբուսով է գալիս ԱԺ, Aravot.am-ը նրանից հետաքրքրվեց՝ իր ընտանեկան բյուջեի վրա ի՞նչ բեռ է լինելու այդ թանկացումը:
Աղազարյանը պատասխանեց, որ «ահագին վախտ է»՝ չի օգտվում տրանսպորտից: Պարզվում է՝ Աղազարյանի գործերը լավացել են, մեքենա է գնել. «Շեվրոլետ Վոլտ եմ գնել՝ 2012թ: Իհարկե, իմ միջոցներն ավելացել են, եթե իմ աշխատավարձը 60 հազար էր, հետո դարձել է 600 հազար, կարա՞ք իմանաք քանի անգամ է ավելացել»:
Ինչ վերաբերում է ուղեվարձի թանկացմանը՝ Աղազարյանն ասաց. «Դուք չեք կարող երթեւեկել MAN-ով ու չվճարել դրա համար: Հիմա տեսնենք ոնց է թանկանում եւ ինչ սկզբունքով, նոր անդրադառնանք, ես մանրամասներին տեղյակ չեմ: Մյուս կողմից էլ նայեք՝ արդեն ինչքան ժամանակ է, որ 100 դրամ է»:
Կարդացեք նաև
Դիտարկմանը, որ մարդկանց բարեկեցությունը չի ավելացել այս ընթացքում, երկրում գնաճ կա՝ Աղազարյաննն արձագանքեց. «Կարող է սովորական քաղաքացու համար սկի չթանկանա, եթե նա էֆեկտիվ օգտագործի իր ժամանակը եւ դրամական միջոցները, պիտի տեսնենք ոնց են այդ քաղաքականությունն իրականացնում»:
Աղազարյանի գնահատմամբ՝ 300 դրամ տրանսպորտի ուղեվարձը, իհարկե, շատ թանկ է. «Բայց եթե ես 300 դրամ տամ եւ ամբողջ օրը երթեւեկեմ, կարող է լավ է: Նրբություններ կան, որ ես չգիտեմ»:
Հռիփսիմե ՋԵԲԵՋՅԱՆ
