Ցանկացած քաղաքական ուժի առանցքային թիմերից մեկը երիտասարդական կառույցն է, որը նոր շունչ և ավյուն է բերում քաղաքական ցանկացած միավորի։ Բացառություն չէ նաև «Համահայկական ճակատ» շարժումը, որը երիտասարդական թիմ ձևավորելու գործում չափազանց ուշագրավ և նորարարական մոտեցում է դրսևորում։ Երիտասարդական կառույց ստեղծվում է ոչ միայն Հայաստանում, այլ նաև միջազգային ընդգրկում ունի, ներգրավում են նաև սփյուռքի գաղթօջախների երիտասարդները, որոնք ի տարբերություն մեծերի` երբեմն շատ ավելի ակտիվ և նախաձեռնող են հայկական խնդիրների լուծման, վերհանման և կարգավորման ուղղությամբ։
Օրեր առաջ Մոսկվայի միջազգային բիզնես կենտրոնում տեղի է ունեցել «Համահայկական երիտասարդական ճակատի» առաջին համաժողովը, մասնակցել են Ռուսաստանի ժողովուրդների բարեկամության համալսարանի, Ռուսաստանի պետական սոցիալական համալսարանի, Մոսկվայի պետական իրավաբանական ակադեմիայի, Հայկական միությունների ղեկավարները և ներկայացուցիչները։
Երիտասարդական թևի ղեկավար Հովհաննես Հարությունյանը նշել է, որ իր ղեկավարած շարժումը քաղաքական նպատակներ չի հետապնդում, նա ավելի շատ մեծ ուշադրություն է դարձնում մարտական գործողությունների վետերանների խնամքի, պատմական հուշարձանների պահպանման անհրաժեշտության, ազգային կրոնի նկատմամբ հարգանքի և հայ ժողովրդի կյանքում Հայ առաքելական եկեղեցու դերի հարցերին, իսկ Ռուսաստանի պետական սոցիալական համալսարանի հայկական միության նախագահ Աստղիկ Մարտիրոսյանը հիշեցրել է, որ առանցքայինը մայրենի լեզվի իմացությունն է, որը հիմք է սեփական պատմության և նախնիների հանդեպ հարգանք սերմանելու, հայ ժողովրդի դարավոր ավանդույթների պահպանման համար։ «Լեզուն արտացոլում է մարդկանց բնավորությունն ու զգացմունքները, լեզուն կորցնելով, մենք կկորցնենք դրա կրողի կուտակած գիտելիքները, հետևաբար համաշխարհային պատմության մի մասը»,- նշել է Աստղիկ Մարտիրոսյանը։
Ռուսական բուհերի հայկական միությունների ղեկավարները պայմանավորվել են կազմակերպել կանոնավոր հանդիպումներ, համատեղ երիտասարդական, սոցիալական միջոցառումներ իրականացնել։ Համաժողովին ողջույնի խոսքով դիմել է նաև «Համահայկական ճակատ» շարժման առաջնորդ, պաշտպանության նախկին նախարար Արշակ Կարապետյանը, նշել, որ անհրաժեշտ է կենտրոնանալ հայոց պետականության և ինքնիշխանության պահպանման ու զարգացման գործում երիտասարդության ահռելի դերի և առաջնահերթությունների ճիշտ ձևակերպման կարևորության վրա։ Նա հատուկ ընդգծել է այն հանգամանքը, որ «Համահայկական ճակատ» շարժումը ոչ ընդդիմադիր է, ոչ՝ իշխանամետ, այն կոչված է պաշտպանելու առաջին հերթին Հայաստանի իրական շահերն ու անկախությունը, այլ ոչ թե Հայաստանում իշխանության մեջ գտնվող առանձին գործիչների շահերը։
Կարդացեք նաև
Փաստացի, «Համահայկական ճակատի» և «Համահայկական երիտասարդական ճակատի» այս մոտեցումը չափազանց ուշագրավ և նոր է, լուրջ թարմություն կարող է բերել Հայաստանի քաղաքական դաշտում, նաև հնարավորություն տալ հազարավոր երիտասարդների տանել իր հետևից՝ Հայաստանի Հանրապետության առջև ծառացած մարտահրավերները լուծելու ուղղությամբ։
